سەرۆك بافڵ: پشتیوانین بۆ روبەڕوبوونەوەی گەندەڵی و سەروەری یاسا

نووسینگەی سەرۆكی یەكێتی

بافڵ جەلال تاڵەبانی سەرۆكی یەكێتی و فایەق زێدان سەرۆكی ئەنجومەنی باڵای دادوەریی عیراق

بافڵ جەلال تاڵەبانی، سەرۆكی یەكێتیی نیشتمانیی كوردستان لە دەباشان پێشوازی لە فایەق زێدان، سەرۆكی ئەنجومەنی باڵای دادوەریی عیراق كرد.

لە دیدارێكدا كە رەفعەت عەبدوڵڵا، بڕیاردەری دەستەی كارگێڕی و خالید شوانی، ئەندامی مەكتەبی سیاسی و نزار ئامێدی، وەزیری ژینگەی عیراق ئامادەبوون، دوایین ئەگەر و پێشهاتە سیاسییەكانی وڵات تاوتوێكران و جەخت لە پاراستنی سەقامگیری و چەسپاندنی یاسا كرایەوە.

هەر لە دیدارەكەدا سەرۆك بافڵ جەلال تاڵەبانی پشتیوانی تەواوی یەكێتی بۆ تێپەڕاندنی بەربەستەكان، گەشەپێدانی دامەزراوەكانی دەوڵەت و خزمەتكردنی زیاتر دووپاتكردەوە و رایگەیاند: "پشتگیری تەواوی بڕیارە یاسایی و دەستوورییەكانی ئەنجومەنی باڵای دادوەری دەكەین لەپێناو روبەڕوبوونەوەی گەندەڵی و سەروەریی یاسا لە وڵاتدا".

PUKMEDIA