قوباد تاڵەبانی و فایق زێدان: رێ بەدەستوەردانی سیاسی لە دادوەری نەدرێت

نووسینگەی جێگری سەرۆكوەزیران

قوباد تاڵەبانی جێگری سەرۆكوەزیران و فایق زێدان سەرۆكی ئەنجومەنی باڵای دادوەری عیراق

قوباد تاڵەبانی جێگری سەرۆكوەزیران، لەگەڵ فایق زێدان، سەرۆكی ئەنجومەنی باڵای دادوەری عیراق كۆبووەوە و لەبارەی رەوشی دادوەری لە هەرێمی كوردستان و عیراق و چۆنییەتی پتەوكردنی پەیوەندییەكانی هەردوولا لەڕووی دادوەرییەوە گفتوگۆیان كرد. 

لە كۆبوونەوەكەدا كە رۆژی 15ی مارسی 2023 لە سلێمانی بەڕێوەچوو و تیایدا جێگر و ژمارەیەك لە ئەندامانی دادگای پێداچوونەوە و ژمارەیەك لە دادوەرانی هەرێمی كوردستان ئامادەی بوون، هەردوولا هاوڕابوون لەسەر پێویستی بەهێزكردنی پەیوەندییە دادوەرییەكانی نێوان هەرێم و دەسەڵاتی فیدراڵی و بە تایبەتیش لەسەر گواستنەوەی ئەزمون و دروستكردنی هەماهەنگی زیاتر لەنێوان ئەنجومەنی دادوەری هەرێم و ئەنجومەنی باڵای دادوەری عیراق جەخت كرایەوە.

هەروەها لە كۆبوونەوەكەدا جەخت كرایەوە لەسەر رادەستكردنی ئەو داواكراوانەی لەنێوان هەرێم و بەغداد هەن و هێشتا دەستگیر نەكراون و بەپێویست زانرا لەمبارەیەوە رێوشوێنی گونجاوتر بگیرێتەبەر بۆ هەماهەنگی زیاتر و نابێت هیچ لایەك رێگری دروست بكات لەبەردەم ئاڵوگۆڕكردنی داواكراوان.

هەردوولاش هاوڕابوون كە شكۆی دەوڵەت لە پاراستنی شكۆ و سەروەری دەسەڵاتی دادوەریدایە و نابێت رێگە بە هیچ جۆرە دەستێوەردانێكی سیاسی لە دەسەڵاتی دادوەری بدرێت.

لە بەشێكی دیكەی كۆبوونەوەكەدا گفتوگۆ لەبارەی دۆخی حكومڕانی لە عیراق و كوردستان كرا و قوباد تاڵەبانی لەمبارەیەوە رایگەیاند: "لە ئێستادا گەورەترین تەحەدای بەردەم حكومڕانی عیراق و كوردستان، چۆنییەتی باشتركردنی دۆخی خزمەتگوزارییەكانە، بۆیە دەبێت خزمەتی باشتری هاووڵاتیان بكرێت".

PUKMEDIA