سەرۆكی فراكسیۆنی یەکێتی: هەڵەبجە شایستەی خزمەت و گەشەپێدانە

PUKMEDIA

سەرۆكی فراكسیۆنی یەکێتی لەئەنجومەنی نوێنەرانی عێراق

هەرێم کەمال ئاغا سەرۆكی فراكسیۆنی یەکێتیی نیشتمانیی کوردستان لەئەنجومەنی نوێنەرانی عیراق، بەبۆنەی پەسەندکردنی پڕۆژەیاسای بەپارێزگابوونی هەڵەبجە پەیامێکی پیرۆزبایی بڵاوکردووەتەوە و دەڵێت، "هەڵەبجە بەقەد گەورەیی مەرگەساتەکەی و قووڵی برین و ماڵوێرانیەکەی شایستەی خزمەت و ئاوەدانی و گەشەپێدانە".

دەقی پەیامەکە...

پیرۆزە پارێزگای نۆزدەیەم

ئەمرۆ (١٣) ئادار لە کۆبونەوەی خۆیدا، ئەنجومەنی وەزیرانی عێراقی فیدرال پرۆژە یاسای بەپارێزگابوونی هەڵەبجەی پەسەند کردو بۆ دەنگدان لەسەری وەک یاسایەکی فیدرالی وەک نۆزدەهەمین پارێزگای عێراق رەوانەی ئەنجومەنی نوێنەرانی عیراق دەکات.

ئەم بڕیارە سەرەنجامی هەوڵی بێووچانی یەکێتی بەتایبەتی فراکسیۆنی یەکێتی لە ئەنجومەنی نوێنەران و لەگەڵ هەوڵی دڵسۆزانەی فراکسیۆنە کوردستانیەکانی ترو دۆست و هاوپەیمانانمان لەخولەکانی پێشوو و ئەم خولەی ئێستادا.

ئێمە وەک فراکسیۆنی یەکێتی هەموو هەوڵەکانمان بەگەڕ دەخەین تا لە نزیکترین دانیشتنی ئەنجومەنی نوێنەراندا بخرێتە بەرنامەی کارەوە ، بەهیمەتی هەموو فراکسیۆنە کوردستانیەکان و دۆست و هاوپەیمانەکانمان لە ئەنجومەنی نوێنەران تێپەرینین.

پیرۆزبایی لە خەڵکی خۆراگری پارێزگای هەڵەبجە دەکەین، لە کەسوکاری سەربەرزی شەهیدان و بریندارانی کیماباران دەکەین. هەڵەبجە بەقەد گەورەیی مەرگەساتەکەی و قووڵی برین و ماڵوێرانیەکەی شایستەی خزمەت و ئاوەدانی و گەشەپێدانە.

سوپاسی هەموو ئەو دۆست و هاوپەیمان و مرۆڤدۆستانە دەکەین لە ئاستە جیاجیاکانی عێراق هاوکار بوون بۆ ئەم بڕیارە مێژووییە، داواکارین لە دابینکردنی بودجەیەکی تایبەت بۆ ئاوەدانی هەلەبجە و بنیادنانی وەک پارێزگایەکی گەشەکردوو هاوکارمان بن.

هەرێم کەمال ئاغا
سەرۆكی فراكسیۆنی یەکێتی لەئەنجومەنی نوێنەرانی عێراق
١٣ی ئاداری ٢٠٢٣