داواده‌كرێت تۆماری پلاندانان بكرێته‌ پێوه‌ر بۆ هه‌ڵبژاردن

PUKMEDIA

دەنگدان

جیاوازییه‌كی زۆر له‌نێوان ئاماری وه‌زاره‌تی بارزگانی و وه‌زاره‌تی پلاندانانی عیراق بۆ سه‌رژمێری دانیشتوانی هه‌رێم هه‌یه‌ و ئه‌ندامێكی سه‌ركردایه‌تی یه‌كێتیش ده‌ڵێت:" ئه‌گه‌ر بنامه‌وێت هه‌ڵبژاردنێكی بێگه‌رد ئه‌نجامبده‌ین پێویسته‌ بۆ هه‌ڵبژاردنی داهاتووی هه‌رێم پشت به‌تۆماری وه‌زاره‌تی پلاندانان ببه‌سترێت".

له‌تیف نێروه‌یی ئه‌ندامی سه‌ركردایه‌تی و لێپرسراوی بۆردی هه‌ماهه‌نگی و به‌دواداچوون له‌ده‌زگای هه‌ڵبژاردنی یه‌كێتیی نیشتمانیی كوردستان به‌ PUKMEDIA ی راگه‌یاند: " یه‌كێتی بۆ هه‌ڵبژاردنی داهاتووی هه‌رێمی كوردستان ته‌ئكید له‌ ئاماری وه‌زاره‌تی پلاندانانی عیراق ده‌كاته‌وه‌، چونكه‌ جیاوازییه‌كی زۆر له‌نێوان ئاماری وه‌زاره‌تی پیلاندانان و وه‌زاره‌تی بارزگانی عیراقدا بۆ دانیشتوانی هه‌رێم هه‌یه‌".

" ئه‌گه‌ر ده‌مانه‌وێت هه‌ڵبژاردنی داهاتووی هه‌رێم پاك و بێگه‌رد بێت، پێویسته‌ لایه‌نه‌كان هاوڕابن له‌باره‌ی ئه‌وه‌ی كه‌ پشت به‌ ئاماری وه‌زاره‌تی پلاندانانی عیراق ببه‌سترێت، نه‌ك وه‌زاره‌تی بارزگانی عیراق" نێروه‌یی وایوت.

ئاماره‌كه‌ی پلاندانان بكرێته‌ پێوه‌ر
ئه‌ندامێكی ئه‌نجومه‌نی نوێنه‌رانی عیراقیش ئاماره‌كانی وه‌زاره‌تی پلاندانان به‌دروستتر ده‌زانێت و ئاماژه‌ بۆ ئه‌وه‌ده‌كات:" بۆ ئاماری دانیشتوانی هه‌رێم پێویسته‌ پشت به‌نوێترین ئامار ببه‌سترێت، كه‌ خه‌مڵاندنه‌كه‌ی پلاندانانه‌".

هه‌ر له‌و باره‌یه‌وه‌ د.نه‌رمین مه‌عروف ئه‌ندامی لیژنه‌ی دارایی له‌ په‌رله‌مانی عیراق بۆ سایتی ره‌سمی یه‌كێتیی نیشتمانی كوردستان PUKMEDIA ی راگه‌یاند:" خه‌مڵاندنی وه‌زاره‌تی پلاندانانی عیراق له‌باره‌ی سه‌رژمێری دانیشتوانی هه‌رێمی كوردستانه‌وه‌ نوێیه‌و ده‌توانرێت پشتی پێ ببه‌سترێت".

ده‌شڵێت:" به‌پێی خه‌مڵاندنی وه‌زاره‌تی پلاندانانی عیراق دانیشتوانی هه‌رێمی كوردستان 5 ملیۆن و 884 هه‌زارو 23 كه‌سه‌ كه‌ 14% دانیشتوانی عیراق پێكده‌هێنێت".

له‌رۆژانی رابردوودا دووجار ده‌زگای هه‌ڵبژاردنی یه‌كێتی و مه‌كته‌بی هه‌ڵبژاردنی پارتی له‌باره‌ی پرسی هه‌ڵبژاردنه‌وه‌ كۆبوونه‌وه‌و رێككه‌وتن كه‌ داتای حكومه‌تی فیدراڵ بۆ بازنه‌كانی هه‌ڵبژاردن به‌كاربهێنرێت، به‌ڵام یه‌كێتی ته‌ئكید له‌ ئاماری وه‌زاره‌تی پلاندانانی عیراق له‌پێناو به‌رژه‌وه‌ندی گشتی ده‌كاته‌وه‌. 


PUKMEDIA