قوباد تاڵه‌بانی: خۆشحاڵم په‌رله‌مان یه‌كێك له‌ ئه‌وله‌ویاتی كاره‌كانمی په‌سه‌ند كرد

PUKMEDIA

قوباد تاڵەبانی جێگری سەرۆک وەزیرانی هه‌رێم

جێگری سه‌رۆك وه‌زیرانی هه‌رێمی كوردستان له‌باره‌ی ده‌رچوونی یاسای كاره‌وه‌ له‌په‌رله‌مانی كوردستان ده‌ڵێت:" خۆشحاڵم دوێنێ په‌رله‌مانی كوردستان یه‌كێك له‌ ئه‌وله‌ویاتی كاره‌كانم كه‌ به‌هێزكردنی كه‌رتی تایبه‌ت و ره‌خساندنی هه‌لی كاری زیاتره‌ په‌سه‌ند كرد".

قوباد تاڵه‌بانی جێگری سه‌رۆك وه‌زیرانی هه‌رێمی كوردستان له‌پۆستێكدا له‌ئه‌كاوه‌نتی تایبه‌تی خۆی له‌ تۆڕی كۆمه‌ڵایه‌تی فه‌یسبوك رایگه‌یاند:" یه‌كێك له‌ ئه‌وله‌ویاتی كاره‌كانم؛ به‌هێز كردنی كه‌رتی تایبه‌ت و ره‌خساندنی هه‌لی كاری زیاتره‌ كه‌ تێیدا ماف و ئیمتیازاتی كرێكار له‌ ده‌ره‌وه‌ی كه‌رتی حكومی پارێزراوبێت، خۆشحاڵم دوێنێ په‌رله‌مانی كوردستان، به‌سوپاسه‌وه‌، یاسای كاری په‌سه‌ند كرد".

" ئه‌م یاسا گرنگه‌ به‌ هه‌وڵی وه‌زاره‌ته‌كانی كارو پلاندانان و راوێژكاره‌كانمان له‌ئه‌نجومه‌نی وه‌زیران و به‌هاوكاری رێكخراوی جیهانی كار، توانرا ئاماده‌سازی بۆ ده‌رچواندنی بكرێ، كه‌ یاساكه‌ پشتبه‌ست به‌ پێوه‌ره‌ نێوده‌وڵه‌تییه‌كان داڕێژراوه‌ و بنه‌ماكانی مافی مرۆڤ و یه‌كسانی و هاوسه‌نگی تێدا پاریزراوه‌". قوباد تاڵه‌بانی وایوت.

ئاماژه‌ی بۆ ئه‌وه‌شكردوه‌:" كاتێك ده‌بینم یاسایه‌ك هه‌یه‌ په‌یوه‌ندی كرێكار و خاوه‌ن كار رێكده‌خاته‌وه‌، ماف و سه‌لامه‌تی كرێكاری نێوخۆیی و بیانیش ده‌پارێزێت، هه‌لی كاری زیاتر ده‌ڕه‌خسێنێت، كاته‌كانی كاركردن دیاری ده‌كات و مافی منداڵ و ژن ده‌پارێزێت، ئه‌وه‌ بۆ من مایه‌ی شانازییه‌". 

جێگری سه‌رۆك وه‌زیرانی هه‌رێمی كوردستان ئه‌وه‌شی خستوه‌ته‌ڕوو:"بۆیه‌ كاتی خۆیه‌تی پیرۆزبایی له‌ كرێكارانی كوردستان بكه‌م و ده‌ستی ماندووبوونیان ده‌گوشم، ئیتر كاتی ئه‌وه‌ هاتووه‌ ئه‌وانیش مافه‌كانی دواڕۆژیان پارێزراو بێت".

PUKMEDIA