لەسەر داوای یەکێتی یاسای دەزگای شەهیدان هەموار دەکرێتەوە

PUKMEDIA

ئەنجومەنی وەزیران

لەسەر داواکاری پێشتری یەکێتیی نیشتمانیی کوردستان ئەمڕۆ سێشەممە 28_2_2023 ئەنجومەنی وەزیرانی بڕیاریدا بە هەموارکردنەوەی یاسای دەزگای شەهیدان.

خالید شوانی وەزیری دادی عیراق لە پەڕەی تایبەتی خۆی لە تۆڕی کۆمەڵایەتی فەیسبوک ڕایگەیاند: "لەچوارچێوەی جێبەجێکردنی بەرنامەی کاری حکومەت کە دەرەنجامی رێککەوتنی نێوان هێزە سیاسییەکانی هاوپەیمانی ئیدارەی دەوڵەتە ئەمڕۆ سێشەممە ئەنجومەنی وەزیران بڕیاریدا بە هەموارکردنەوەی یاسای دەزگای شەهیدان".

ئەوەش دەڵێت: "بەپێی هەموارەکە، کەسوکاری ( شەهیدانی پێشمەرگەو دەزگا ئەمنییەکانی هەرێمی کوردستان ) لەکەرکوک و ناوچە جێناکۆکەکان مەشمول دەبن بە یاسای دەزگای شەهیدان و هاوشێوەی شەهیدانی عیراق سودمەند دەبن لەروی ماددی و مەعنەوییە".

خالید شوانی نوسیویشیەتی: "ئەو داواکارییەی ئەمڕۆ بڕیاری لەسەردرا، لەسەرەتاوە داواکاری یەکێتی نشتیمانی کوردستان بوو لە دانوساندنەکانی دامەزراندنی حکومەت و لە رێککەوتنەکەدا چەسپێندراوە".

PUKMEDIA