سەرۆک بافڵ: دەستور خاڵی یەکلاکەرەوەی کێشەکان بێت

نوسینگەی رۆژنامەوانی بافڵ جەلال تاڵەبانی

کۆبوونەوەی سەرۆک بافڵ و جەمال کەربولی

بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە جەمال کەربولی، سەرۆکی وەفدی هاوپەیمانیی یەکگرتووی ئەنبار و ژمارەیەک کەسایەتی سیاسیی هاوپەیمانییەکە کرد.

لە دیدارێکدا کە شاڵاو کۆسرەت رەسوڵ ئامادەیبوو، دوایین گۆڕانکارییە سیاسییەکان تاوتوێکران و جەخت لە بەردەوامی هەماهەنگییەکان و کاری پێکەوەیی کرایەوە لەپێناو سەرخستنی پرۆسەی سیاسی و جێبەجێکردنی بەرنامەکانی حکومەت بۆ چاکسازی و پێشکەشکردنی خزمەتگوزاری زیاتر.

لە درێژەی دیدارەکەدا پەرەپێدانی پەیوەندی لەمێژینەی نێوان هەردوولا بەتایبەت هێز و کەسایەتییە سیاسییەکانی ئەنبار کە بناغەیەکی بەهێزی سیاسی هەیە دووپاتکرایەوە.

سەرۆک بافڵ جەلال تاڵەبانی ئاماژەی بە دۆخی سیاسیی وڵات و دوایین گۆڕانکارییەکان کرد و رایگەیاند، دەبێت هەوڵەکانمان بە ئامانجی گەیشتن بە چارەسەری ریشەیی و یەکجارەکی بەردەوامبێت و دەستوور خاڵی یەکلاکەرەوەی کێشەکان بێت.