سەرۆك بافڵ: یەكێتی سازشی لەسەر خاكی كوردستان نەكردووە و نایكات

PUKMEDIA

موڕافەعە گەورەكەی سەرۆك مام جەلال لە ئەنجومەنی حوكم

لە یادی 19 یەمین ساڵڕۆژی موڕافەعە گەورەكەی سەرۆك مام جەلال لە ئەنجومەنی حوكم، سەرۆك بافڵ پەیامێكی بڵاوكردەووە و رایگەیاند: "خەبات و هەوڵدانی لەمێژینەی سەرۆك مام جەلال لەپێناو كەركووك و پاراستنی شوناسی شارەكە دەیسەلمێنێت كە باوەڕی نەگۆڕ و پتەومان سەبارەت بە كوردستانیبوونی كەركووك روونە، هەربۆیە كاراكردنەوەی مادەی 140ـمان لە كارنامەی حكومەتی نوێدا جێگیركرد و هەموو هەوڵێكیشمان لەپێناو جێبەجێكردنیدا دەبێت.

دەقی پەیامەكە: 

ئەمڕۆ 19 ساڵ بەسەر مورافەعە مێژووییەكەی سەرۆك مام جەلال بۆ سەلماندنی كوردستانیبوونی كەركووك و ناوچە دابڕێندراوەكان لە ڕێگەی بەڵگەی مێژوویی و یاساییەوە تێدەپەڕێت.

خەبات و هەوڵدانی بێوچان و لەمێژینەی سەرۆك مام جەلال لەپێناو كەركووك و پاراستنی شوناسی شارەكە، نیشاندەری ئەو راستییە حاشاهەڵنەگرەیە كە یەكێتیی نیشتمانیی كوردستان هەرگیز سازشی لەسەر خاكی كوردستان نەكردووە و نایكات. باوەڕی نەگۆڕ و پتەوی ئێمە سەبارەت بە كوردستانیبوونی كەركووك روونە، بەڵام تەبایی و پێكەوەژیانی نێوان نەتەوە و كەلتوورە جیاوازەكانی شارەكەمان لەیادنەكردووە و پارێزگاریمان لێكردووە.

ئێمە بە شوێنپێی سەرۆك مام جەلال و سوودوەرگرتن لە میراتە دەوڵەمەندەكەیدا دەڕۆین، هەربۆیە لەماوەی رابردوودا لە ماڵەكەی خۆی لە بەغدا كە كۆكەرەوەی هەموو دەنگە جیاوازەكان بوو، كاراكردنەوەی مادەی 140ـمان لە كارنامەی حكومەتی نوێدا جێگیركرد و هەموو هەوڵێكیشمان لەپێناو جێبەجێكردنیدا دەبێت.

سڵاوی قارەمانێتی و خۆڕاگری بۆ كەركووكییە سەربەرزەكان دەنێرین و پێیاندەڵێین شارەكەتان قودسی كوردستان بووە و هەرواش دەمێنێتەوە.

بافڵ جەلال تاڵەبانی
سەرۆكی یەكێتیی نیشتمانیی كوردستان

PUKMEDIA