خاوەنی «شار» کۆچی دوایی کرد

د.شێرزاد حەسەن

سلێمانی — چیرۆکنووس و ئەدیبی دیاری کوردستان، مامۆستا حوسێن عارف، دوای تەمەنێک خزمەتکردن بە ئەدەب و چیرۆکی کوردی و پێشکەشکردنی بەشێکی گرنگ لە ژیانی بە وشە و قەڵەم، کۆچی دوایی کرد.

حوسێن عارف، کە لە ساڵی ١٩٣٦ لە سلێمانی لەدایک بووە، یەکێک بوو لە پێشینەکانی چیرۆکی نوێی کوردی و لە دامەزرێنەرانی ڕەوتی «روانگە» و چیرۆکی نوێی کوردی دادەنرێت. ناوی بە تایبەتی بە رۆمانی «شار»ەوە گرێدراوە؛ بەرهەمێک کە لە مێژووی ڕۆمانی کوردیدا شوێنێکی تایبەتی هەیە.

رۆمانی «شار» کە بەرگی یەکەمی لە ساڵی ١٩٨٦ و بەرگی دووەمی لە ساڵی ٢٠٠١ بڵاوکرایەوە، وێنەیەکی ورد و قووڵە لە بارودۆخی سیاسی، فکری و کۆمەڵایەتیی شاری سلێمانی و کۆمەڵگەی کوردی، بە تایبەتی لە ماوەی نێوان ساڵانی ١٩٤٢ تا ١٩٥٨.

حوسێن عارف تەنها چیرۆکنووس نەبوو؛ بەڵکو ڕۆژنامەنووس، یاسناس و پارێزەریش بوو و لە یەکێتیی نووسەرانی کورد و سەندیکای ڕۆژنامەنووسانی کوردستان ئەندام بوو. هەروەها لە خولی یەکەمی پەرلەمانی کوردستاندا ئەندامی پەرلەمان بوو و لە لیژنەی کاروباری یاسایی پەرلەماندا کاری کردووە.

لە بەرهەمە ئەدەبی و لێکۆڵینەوەکانی حوسێن عارفدا، جگە لە «شار»، ناوی کتێب و بەرهەمەکانی وەک «گەلە گورگ»، «چای شیرین»، «کۆکتێل»، «تەمەنێک لە بندەستی»، «توێشووی سەفەرێکی سەخت»، «ئەندێشەی مرۆڤێک»، «ساڵێک لە تەمەن»، «شانۆگەری جەنابی جانەوەر»، «قوتابخانەی شیعری تازە» و چەندین بەرهەمی دیکەی ئەدەبی و لێکۆڵینەوەیی دەبینرێت.

ژیانی حوسێن عارف بە مێژووی ئەدەب و ڕۆژنامەوانی و ڕووداوە سیاسی و کۆمەڵایەتییەکانی کوردستاندا تێکەڵ بوو. بە قەڵەمەکەی، ژیان و خەم و ئازار و هیواکانی کۆمەڵگەی کوردی تۆمار کرد و بەشێک لە مێژووی ئەو سەردەمەی بە وشە بەجێهێشت.

بە کۆچی دوایی ئەم ئەدیب و چیرۆکنووسە، ئەدەبیاتی کوردی یەکێک لە قەڵەمە بەئەزموون و کاریگەرەکانی لەدەست دا؛ بەڵام بەرهەمەکانی، بە تایبەتی «شار»، هەروا لە یاد و بیرەوەریی خوێنەرانی کورددا دەمێنێتەوە.

ماڵئاوا مامۆستا حوسێن عارف؛ قەڵەمەکەت لە «شار»دا هەروا دەنووسێت و ناوت لە مێژووی ئەدەبی کوردیدا دەمێنێتەوە.

PUKMEDIA