riklam

لە قەڵاچوالان مەراسیمی یادی 50 ساڵەی شەهیدبوونی خاڵە شیهاب بەڕێوەچوو

کوردستان 05:55 PM - 2026-11-22
یادی 50 ساڵەی شەهیدبوونی خاڵە شیهاب PUKMEDIA

یادی 50 ساڵەی شەهیدبوونی خاڵە شیهاب

ئەمڕۆ 22ی11ی2026، لە قەڵاچوالان بە ئامادەبوونی لێپرسراوانی باڵای یەکێتیی نیشتمانیی کوردستان و تێکۆشەرانی دێرین و کەسوکاری سەربەرزی شەهیدان و فەرماندەکانی پێشمەرگە، مەراسیمی یادی 50 ساڵەی شەهیدبوونی خاڵە شیهاب بەڕێوەچوو، کە تیایدا بە وتار و بەڵگە فیلم و کتێب باس لە ژیانی شەهید خاڵە شیهاب و هاوڕێکانی کرا و بە چالاکی هونەری یادی بەرز راگیرا.

 نەرمین عوسمان:  ئیرادەی گەلەکەمان بە ترس و تۆقاندن نەشکێندرا

سەرەتای مەراسیمەکە بە ساتێک وەستان بۆ گیانی پاکی شەهیدان لەگەڵ مارشی نیشتمانی ئەی رەقیب دەستیپێکرد، پاشان وتاری هاوبەشی ئینستیوتی نارین رێکخراوی بەرزجە لەلایەن نەرمین عوسمان پێشکەشکرا و رایگەیاند: ئەمڕۆ لەم وێستگە مێژووییەدا یادی 50 ساڵەی بەسەر لە سێدارەدانی هەرسێ سەرکردە و هێمای  بەرخودان، شەهاب شێخ نوری و جەعفەر عەبدولواحید و ئەنوەر زۆراب دەکەینەوە، کە لوتکەیەکی پڕ لەشکۆ و کۆڵنەدانەوە ئەو راستیە دەسەلمێنێت، کە داگیرکەر ویستی لەرێگەی زیندان و ترس و تۆقاندنەوە ئیرادەی نەتەوەیەک بشکێنێت، بەڵام وەک هەمیشە خەیاڵی خاو بوو،چونکە خوێنی گەشی ئەوان بووە هەوێنی وەرچەرخانێکی مەزن و مژدە بەخشێکی شۆڕشێکی نوێ.

وتیشی: دوای رێککەوتنی جەزائیر، رژێمی بەعس پێیوابوو، دۆزی کوردی بۆ هەتا هەتایە زیندەبەچاڵ کردووە، لەو شەوە زەنگەدا، خەباتی ئەم سەرکردانە بوونە مەشخەڵێک و سەلماندیان کە خەونی ئازادی نە بە شکستی سەربازی خامۆش دەبێت و نە بەپیلانی نێودەوڵەتی دەخنکێنرێت، ئەم سەرکردانە بە دروشمی کەم ژیان و کەڵ ژیان، بەرەو پەتی سێدارە رۆیشتن و  ورەی دوژمنیان رماند.

جەمیل هەورامی: لەبەر چەند هۆکارێک رۆژی شەهیدمان دیاری کرد

جەمیل هەورامی، سەرۆکی کۆمەڵەی پێشمەرگە دێرینەکانی کوردستان، لە وتەیەکیدا رایگەیاند: بۆ ئەوەی یادی سەرجەم شەهیدان بکەینەوە، پێشنیارم بۆ سەرکردایەتی کرد، رۆژێک بکرێت بە رۆژی شەهیدی یەکێتی، دوای گفتوگۆیەکی زۆر بڕیاردرا رۆژی شەهید بوونی ئەو سێ سەرکردەیە بکرێتە رۆژی شەهید، چونکە ئەوان بە پیلانی دوو دەوڵەتی دیکتاتۆر شەهید کران و دواتر بە دروشمی کەم ژیان و کەڵ ژیان چوونە بەرپەتی سێدارە، بۆیە ئەو رۆژە پەسند کرا.

وتیشی: دەبێت هەمووان شانازیان پێوە بکەین، یەکەم سەرکردەی زیندانی سیاسی بوون و یەکەم سەرکردەش بوون کە بەو شێوازە دەستگیر بکرێن، لەوەش زیاتر لە زیندانیشدا ئامادە نەبوون دەستبەرداری خەباتی گەلەکەیان ببن.

کتێبی شەهاب شێخ نوری داستانی ژیانەوەی نەتەوەیەک لە هەشت بەش پێکدێت

هەر لەو مەراسیمەدا، خەڵەف غەفور ئامادەکاری کتێبی شەهاب شێخ نوری داستانی ژیانەوەی نەتەوەیەک رایگەیاند: چوار لەو هاوڕێیانەی کۆمەڵە کە لە زینداندا لەگەڵ کاک شەهاب بوون، ئێستا لەگەڵماندان ئەوانیش هەڤاڵان (د. ئەرسەلان بایز، عەلی بچکۆل، عوسمان نانەوا و فاروق رەشانین)، بەخێرهاتنی تایبەتیان دەکەین و ئێوە قارەمانانی کەم ژیان و کەڵ ژیانن.

وتیشی: لە ساڵی 2023، کتێبی لە خاچدانی داربەڕوو، داستانی نەمری جەعفەر عەبدولواحید مان بڵاوکردەوە، کە یەکێک بوو لە قارەمانەکان، بۆ تەواوکردنی تێکۆشەرانی کۆمەڵە، ئەمساڵ کتێبی شەهاب شێخ نوری داستانی ژیانەوەی نەتەوەیەک ئامادە کرا، کە لە هەشت بەش پێکدێت و بەشی یەکەمیان دوو وتاری مێژوویی سەرۆک مام جەلالە، کە بە عەشقەوە بۆ کاک شەهاب و هاوڕێکانی نوسیوە، بەشەکانی دیکەش تایبەتن بە چاوپێکەوتن و توێژینەوە و گێڕانەوەی شەرحی پەراوی لێکۆڵینەوە لە ئێران و رادەستکردنەوەیان بە ئەمنی سلێمانی.

 پاشان لە مەراسیمەکەدا، هەڵسەنگاندن و ناساندنی کتێبەکە لەلایەن د. ئەحمەد حەمەد ئەمین بەڕێوەچوو، لەگەڵ خوێندنەوەی چەند پارچە هۆنراوەیەک لەلایەن هەڵۆ شێرکۆ بێکەس.

هەر لەو مەراسیمەدا، بەڵگە فیلمێک لەسەر ژیانی خاڵە شیهاب نمایش کرا کە لە دەرهێنانی هاوار مستەفا خان بوو.

سۆزان خاڵە شەهاب: ماڵپەڕێک دەکەینەوە هاوکارمان بن

 لە کۆتایشدا، وتاری بنەماڵە لەلایەن سۆزان خاڵە شەهاب پێشکەش کرا و سوپاسی ئامادەبووانی کرد و رایگەیاند: دەرکردنی کتێبەکە خەونێک بوو هاتە دی، سوپاس بۆ رێکخستنی ئەم مەراسیمە.

ئاماژەی بەوەشکرد: ئێمە هەوڵی دروستکردنی ماڵپەڕێکی ئەرشیفین، بۆیە داواکارم وێنەیەکیان هەیە، نامەیەکیان هەیە، کە خەتێکی باوکمی لەسەرە پێمان بەخشن و لای ئێوە یادگارییە و لای ئێمەش پارێزراوە.

PUKMEDIA

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket