دوو ئاگر لە سنوورى شارباژێڕ کەوتەوە و کۆنتڕۆڵ کرا

راگەیاندنى پۆلیسی دارستان و ژینگەی پارێزگای سلێمانی

وێنەیەکى ئاگرەکەى سیتەک

شەوی ڕابردوو لە سنوری گوندەکانی (وەڕاز و گردە زوبێر و چەمی سنکێ و چەمی قوتابیان)ى شارباژێڕ ئاگرێکی ڕووبەر فراوان کەوتەوە، هاوکات لەناحیەی سیتەک بە هۆکارێکی نادیار ڕووداوێکی ئاگر کەوتنەوە ڕوویدا.

بە هەوڵ و هەڵمەتى سەرجەم هێزەکان لە پۆلیسی دارستانی شارباژێڕ، بنکەی سیتەک و ماوەت، بەرگری شارستانی و ژینگە دۆستانی سنورەکە و خەڵکى دڵسۆز توانرا ئاگرەکە کۆنتڕۆڵ بکرێت.

سەبارەت بە ئاگرەکەى سیتەک بەڕێوەبەرایەتی پۆلیسی دارستان و ژینگەی پارێزگای سلێمانی رایگەیاند: هۆکاری سەرەکی ئاگرکەوتنەوەکە نادیارە و بەپێی دەرئەنجامە سەرەتاییەکان ڕوبەری 20 دۆنم لە پوش و پاوان و داری سروشتی سووتاوە و زیان بەچەند باخێکی هاووڵاتیان گەیشتووە .

هاوکات سەبارەت بە ئاگرەکەى سنوری گوندەکانی (وەڕاز و گردە زوبێر و چەمی سنکێ و چەمی قوتابیان) بەڕێوەبەرایەتی پۆلیسی دارستان و ژینگەی پارێزگای سلێمانی رایگەیاند: هۆکاری سەرەکی ئاگرکەوتنەوەکە نادیارە و لێکۆڵینەوە دەستیپێکردوە و پەڕاو ڕێکخراوە، بەپێ دەرئەنجامە سەرەتاییەکان ڕوبەری زیاتر لە هەزار دۆنم پوش و پاوان سووتاوە و زیان بە ژمارەیەک ڕەز و باخی هاووڵاتیان گەیشتووە.

PUKMEDIA