پسپۆڕ‌انی میدیا: میدیاكانی پارتی نابه‌رپرسیارانه‌ رووماڵی هێرشه‌كانی سه‌ر سلێمانی ده‌كه‌ن

میدیاکان

سوتانی پوش و پاوان دوای هێرشەکان

پێدانی زانیاری به‌ نه‌یارانی كورد، له‌لایه‌ن میدیاكانی پارتییه‌وه‌، نیگه‌رانی پسپۆرانی میدیا و ئیداره‌ی شاره‌كه‌ و هاووڵاتیانی لێكه‌وتووه‌ته‌وه‌ و داوا ده‌كرێت، میدیاكانی پارتی به‌رپرسیارانه‌تر رووماڵی ئه‌و هێرشانه‌ بكه‌ن، كه‌ ده‌كرێنه‌ سه‌ر پارێزگای سلێمانی، پسپۆرێكی میدیاش ده‌ڵێت: هه‌ندێك میدیای پارتی ناونیشانێكیان بۆ هه‌واڵه‌كانی ئه‌مشه‌ویان له‌ باره‌ی بۆردومانه‌كه‌ی سلێمانی داده‌نا دوور بوو له‌ ئه‌خلاقی میدیایی.

د. كارزان محه‌مه‌د، پسپۆڕ‌ له‌ یاسای ئیتیكی میدیایی، له‌ لێدوانێكیدا بۆ PUKMEDIA، رایگه‌یاند: هه‌ر كه‌س و لایه‌ن و ده‌وڵه‌تێك په‌لاماری ئه‌نجام داوه‌، پێویسته‌ ناوه‌كه‌ی بنوسرێت، ئه‌گه‌ر نازانن یا ناوێرن ناوی بڵێن، لایه‌نی كه‌م خه‌ڵك به‌هه‌ڵه‌دا مه‌به‌ن!

د. كارزان، له‌ لێدوانه‌كه‌یدا، نموونه‌یه‌ك ده‌هێنێته‌وه‌، كه‌ میدیایه‌ك وه‌ك مانشێتێكی گه‌وره‌ نوسیویه‌تی و ده‌ڵێت: میدیایه‌ك، له‌بری ئه‌وه‌ی بنوسرێ هێرش بۆسه‌ر سلێمانی، نوسیویانه‌ هێرشه‌كه‌ی سلێمانی، وه‌ك بڵێی شاره‌كه‌ په‌لاماره‌كه‌ی ئه‌نجام دابێت!

هاوكات، ئه‌م رووماڵه‌ نا به‌رپرسانه‌، سه‌ندیكای رۆژنامه‌نوسانی هێنایه‌ ده‌نگ و له‌ راگه‌یه‌ندراوێكیدا، لقی سلێمانی سه‌ندیكای رۆژنامه‌نوسانی كوردستان، داوای كرد: رێگه‌ نه‌درێت كه‌ناڵه‌كان ببنه‌ سه‌كۆیه‌ك بۆ هه‌ڕ‌ه‌شه‌ له‌سه‌ر ئاسایشی نیشتمانی و سنووری سلێمانی، هه‌روه‌ها ھه‌ر سه‌رچاوه‌یه‌كی زانیاری ره‌سمیی نه‌بێت یان لێدوانی وته‌بێژانی دامه‌زراوه‌ ئه‌منییه‌كان نه‌بێت، پشتی پێنه‌به‌سترێت.

سه‌ندیكا رێنمایی میدیاكان ده‌كات، كه‌ خۆیان له‌ بڵاوكردنه‌وه‌ی وتی وتی و هه‌واڵی چه‌واشه‌كار و بێبنه‌ما بپارێزن و روماڵی شوێنی بۆردومان و ته‌قینه‌وه‌كان نه‌كه‌ن، تا لایه‌نی به‌رپرس پشكنین بۆ شوێنه‌كه‌ نه‌كه‌ن.

ده‌شڵێت: له‌شوێنی بۆردومانه‌كاندا میدیا چاوپێكه‌وتن و كۆبوونه‌وه‌ و قه‌ره‌باڵغی خه‌ڵكی دروست نه‌كات، هه‌روه‌ها دیاریكردنی جوگرافیای شوێنی روداو شكاندنی پرۆتۆكۆڵی به‌رپرسیارێتی یاساییه‌.

ئه‌مه‌ش له‌كاتێكدایه‌، له‌گه‌ڕ‌ی سێیه‌می جه‌نگی ئه‌مریكا و ئێران، شه‌وی رابردوو چه‌ند شوێنێكی شاره‌كانی هه‌رێمی كوردستان بۆردومانكران، كه‌ چه‌ند هێرشێكیش بۆ سه‌ر سلێمانی ئه‌نجامدران.

PUKMEDIA