بە ئامادەبوونی قوباد تاڵەبانی یەكەمین بانكی جینی رووەكیی لەسلێمانی دەكرێتەوە

PUKMEDIA

یەكەمین بانكی جینی رووەكیی لەسلێمانی دەكرێتەوە

بە ئامادەبوونی قوباد تاڵەبانی، جێگری سەرۆكوەزیرانی هەرێم، یەكەمین بانكی جینی رووەكیی لەسلێمانی كرایەوە، وەزیری كشتوكاڵیش رایگەیاند: بانكی جینی رووەكیی هەزاران هەلی كاری ناڕاستەوخۆ دەڕەخسێنێت و بۆ چەندین سێكتەری جیاواز گرنگە.

ئەمڕۆ 23ی 8ی 2026، بە ئامادەبوونی قوباد تاڵەبانی، جێگری سەرۆكوەزیرانی هەرێم، یەكەمین بانكی جینی رووەكیی لەپاركی هەواری شار لەسلێمانی كرایەوەو بێگەرد تاڵەبانی، وەزیری كشتوكاڵی هەرێم رایگەیاند: هیوادارین بتوانین لەداهاتوودا پڕۆژەی باشتر و گەورەتر لەپارێزگای سلێمانی بكەینەوە، چونكە بەكردنەوەی بانكی جینی رووەكیی و پڕۆژەی لەمجۆرە هەزاران هەلی كاری ناڕاستەوخۆ دەڕەخسێندرێت.

راشیگەیاند: بانكی جینی رووەكی بۆ چەندین سێكتەری جیاواز گرنگە و دەتوانێت چەندین بنەتۆوی جیاوازی ئاست بەرز بۆ جوتیاران دابین بكات، چونكە ئەم بانكە لەگەڵ ناوەندە زانستییەكان كار لەسەر روبەڕوبوونەوەی ئاڵنگارییە ژینگەییەكان دەكات.

هاوكات د. هەڤاڵ ئەبوبەكر، پارێزگاری سلێمانی رایگەیاند: سنووری پارێزگای سلێمانی 600 جۆر رووەكی تێدایە، كە لە هەموو جیهان بەس لەسلێمانی هەن، بۆیە بۆ كردنەوەی بانكی جینی رووەكی، شوێنێكی گونجاو  هەڵبژێردراوە.

ئاماژەی بەوەشكرد: بەپێی بەرنامەی یەكێتی ئەوروپا، لەساڵی 2027 بۆ 2035 سلێمانی دەبێت بە سەرچاوەی سەبەتەی خۆراكی عیراق و دەچێتە سەر رێڕەوی تازەی بازرگانی.

رۆژی 7ی 7ی 2025، قوباد تاڵەبانی، جێگری سەرۆكوەزیران، بەردی بناغەی یەكەمین بانكی جینی رووەكی لەسلێمانی-هەرێمی كوردستان-عیراق دانا، بۆ كۆكردنەوە و پاراستنی بنەتۆ و رەگەز و وەچەی ئەو رووەك و ئاژەڵ و زیندەوەرانەی كە مۆركی رەسەنی كوردستانی و عیراقیان پێوەیە.

جین بانك پڕۆژەیەكی گرنگی ستراتیژی گەشتوكاڵییە و بودجەكەی لەلایەن رێكخراوی فاوەوە دابین كراوە، پڕۆژەكە لەسەر رووبەری 100 دۆنم زەوی جێبەجێ كراوە، بە ئامانجی كۆكردنەوە و پاراستنی بنەتۆ و رەگەز و وەچەی ئەو رووەك و ئاژەڵ و زیندەوەرانەی كە مۆركی رەسەنی كوردستانی و عیراقیان پێوەیە.

هاوكات لە چوارچێوەی پڕۆژەكەدا ناوەندێكی زانستیش دامەزراوە بۆ توێژینەوە لەسەر رووەك و ئاژەڵ و زیندەوەرەكان و چۆنییەتی پاراستنیان و ژمارەیەكی بەرچاویش هەلی كار بۆ پسپۆڕانی بوارەكە دەڕەخسێنێت.

PUKMEDIA