سەركەوت زەكی: نوێكردنەوەی پەیكەری یەكێتی ئامادەكارییە بۆ هەڵبژاردن و بەهێزكردنی ئۆرگانەكان

PUKMEDIA

سەركەوت زەكی، ئەندامی مەكتەبی سیاسی و لێپرسراوی مەڵبەندی سلێمانیی یەكێتیی نیشتمانیی كوردستان

سەركەوت زەكی رایدەگەیەنێت: دوای سەركەوتنەكانی هۆڵبژاردن و كۆنگرە، یەكێتی پڕۆسەیەكی گشتگیری بۆ ڕێكخستنەوە و نوێكردنەوەی پەیكەری ڕێكخراوەیی خۆی دەستپێكردووە، ئامانج لەم گۆڕانكارییانەش بەهێزكردنی ئۆرگانەكان، ئامادەكاری بۆ هەڵبژاردن و گونجاندنی حزبە لەگەڵ پڕەنسیپەكانی سۆشیال دیموكرات و داواكارییەكانی كۆمەڵگەدا.

سەركەوت زەكی، ئەندامی مەكتەبی سیاسی و لێپرسراوی مەڵبەندی سلێمانیی یەكێتیی نیشتمانیی كوردستان، لەدیدارێكدا كە لەبەشی چاوپێكەوتنی  PUKMEDIA  دا بڵاوكردەوەتەوە رایگەیاند: یەكێتی پڕۆسەیەكی گشتگیری بۆ ڕێكخستنەوە و نوێكردنەوەی پەیكەری ڕێكخراوەیی خۆی لەسەر بنەمای گۆڕانكارییەكانی دوای ساڵی 2021 و سەركەوتنەكانی یەكێتی لەكۆنگرە و هەڵبژاردنەكاندا دەستپێكردووە، بڕیاری كۆتاییش سەبارەت بە پەیكەرە نوێیەكە لە دوای زنجیرەیەك كۆنفرانسی ناوخۆیی و كۆبوونەوەی دوو ڕۆژەی قەڵاچوالان دراوە.

راشیگەیاند: گۆڕانكارییەكان بەشێك لە مەكتەبەكانی گرتووەتەوە، بەشێوەیەك ژمارەیەك مەكتەب هەڵوەشێنراونەتەوەو لەناو مەكتەبی كاروباری ڕێكخراوەییدا كۆكراونەتەوە، هاوكات مەڵبەندەكان خراونەتە سەر ئاستی پارێزگاو ئیدارە سەربەخۆكان، هاوكات كۆمیتەكان لەڕووی قەبارەو دەسەڵاتەوە هاوشێوەی مەڵبەندەكانی جارانیان لێهاتووە.

وتیشی: تەواوی دۆسیەكانی (كۆمەڵایەتی، كاروباری حكومەت، و ڕێكخراوە دیموكراتییەكان) هێنراونەتە ناو هەیكەلی مەڵبەند و كۆمیتەكانەوە، هاوكات پەیكەرە نوێیەكە هاوتایە لەگەڵ پرەنسیپەكانی سۆشیاڵ دیموكراتی جیهانی و بەڕەچاوكردنی تایبەتمەندیی كۆمەڵگەی كوردی داڕێژراوە.

سەركەوت زەكی، ئاماژەی بەوەشكرد: لەگۆڕانكارییەكاندا رەچاوكردنی لێهاتوویی و پێكهاتەی ئایینی و نەتەوەیی ناوچەكان (وەك مەسیحییەكان لە سلێمانی و پێكهاتەكان لە كەركووك) كراوەو مامەڵە لەگەڵ ئاوارەكان وەك میوان دەكرێت و كاری رێكخستنیان لەناودا ناكرێت، چونكە دەنگ و جۆگرافیای راستەقینەیان سەر بە ناوچەكانی خۆیانە.

راشیگەیاند: كۆكردنەوەو ئاڕاستەكردنی تەواوی سەرچاوە مرۆییەكانی یەكێتی لەئۆرگانی بەهێزتردا، هەنگاوێكی ڕاستەوخۆیە بۆ سەركەوتن لە ململانێ دیموكراتی و هەڵبژاردنەكاندا، هاوكات جەخت لەوە دەكەینەوە كە كاری حزبی چالاكییەكی ئارەزوومەندانەو خۆبەخشانەیە بۆ بەدیهێنانی ئامانجە سیاسییەكان، نەك ئامڕازێك بۆ دابینكردنی مووچەو جێگرەوەی دامودەزگاكانی حكومەت.

دەقی چاوپێكەوتنەكە لەم لینكەدایە: 

سەركەوت زەكی: گۆڕانكارییەكانی یەكێتی جگە لەكەسەكان، پەیكەری رێكخراوەییش نوێدەكاتەوە

PUKMEDIA  كوردستانی نوێ