سەعات 12ی ئەمشەو دەروازەی ناونووسین بۆ حەج دادەخرێت

ئەرشیفی PUKMEDIA

حاجیانی هەرێم

وتەبێژی بەڕێوەبەرایەتی حەج و عومرەی هەرێمی كوردستان رایگەیاند: پڕۆسەی ناونووسینی حەج بە شێوەیەكی خۆڕایی و دیجیتاڵی بەڕێوەچوو و سەعات 12ی ئەمشەو دەروازەكە بە یەكجاری دادەخرێت، ئاماژەی بەوەشدا كە تائێستا نزیكەی 73 هەزار هاووڵاتی فۆڕمیان پڕكردووەتەوە و پاش تەواوبوونی كاتەكەش، قۆناغی پشكنینی ناوەكان و دیاریكردنی وادەی تیروپشك دەستپێدەكات.

 كاروان ستونی، وتەبێژی حەج و عەمرەی هەرێم، بەوێبسایتی رەسمی یەكێتیی نیشتمانیی كوردستان PUKMEDIA ی راگەیاند: لە 21ی تەممووزەوە راگەیەندرا و هاووڵاتییان بە خۆڕایی ناوی خۆیان تۆمار كرد، ئەمڕۆش دوای درێژكردنەوەی وادەكە، دوا مۆڵەتە و سەعات 12ی شەو دەروازەكە دادەخرێت.

سەبارەت بە ژمارەی بەشداربووان، كاروان ستوونی رایگەیاند: تا ئێستا نزیكەی 73 هەزار فۆرم پێشكەش بە دەروازەی حەج كراوە و رۆژانە بە لانی كەم 1500 كەس فۆرمیان پڕ كردووەتەوە، بڕیار بوو تاوەكو 5ی ئاب ناونووسین بەردەوام بێت، بەڵام لەسەر داواكاری خەڵك وادەكەمان درێژ كردەوە.

لەبارەی شەفافییەت و پاراستنی مافی هاووڵاتیان، كاروان ستوونی روونی كردەوە: مافی كەس ناخورێت، چونكە پێناسی دیجیتاڵی هەر كەسێك كە تۆمار دەكرێت، ناتوانرێت دووبارە بنووسرێتەوەو هاووڵاتییان دەتوانن لە رێگەی ئەپڵیكەیشنی KRDPASS خزمەتگوزارییەكانی حەج بەكاربهێنن و هەر لەوێشەوە ئاگاداری ئەنجامی تیروپشكەكان بن.

ئەمەش لەكاتێكدایە، بڕیارە دوای داخرانی دەروازەكە لە ئەمشەودا، قۆناغی پشكنینی ناوەكان دەستپێبكات و دواتر وادەیەك بۆ ئەنجامدانی تیروپشك بۆ دیاریكردنی ناوی ئەو كەسانە رابگەیەنرێت كە بۆ حەجی ئەمساڵ سەفەر دەكەن.

PUKMEDIA