كۆمەڵگەی پەروەردەیی مارگرێت تەواوی قازانجی ساڵێكی خوێندن دەبەخشێتە نەخۆشخانەی هیوا

PUKMEDIA

كۆمەڵگەی پەروەردەیی مارگرێت

لەدەستپێشخەرییەكی مرۆیی و نیشتمانییدا، د. تەها رەسوڵ، خاوەنی كۆمەڵگەی پەروەردەیی مارگرێت، بڕیاریدا تەواوی قازانجی ساڵی خوێندنی (2026-2027) ی كۆمەڵگەی پەروەردەیی مارگرێت پێشكەش بەنەخۆشخانەی هیوا بكات، بە ئامانجی هاوكاریی كردنی تووشبووانی شێرپەنجەو بەكلتوركردنی بەخشین لەلایەن سەرمایەدارانەوە.

لەوبارەیەوە هەرێز ئازاد حەسەن، بەڕێوەبەری خوێندنگەی مارگرێت، لە لێدوانێكیدا بە PUKMEDIA ی راگەیاند: لەدەستپێشخەرییەكی بێوێنەو پڕ لەمۆڕاڵی نیشتمانیدا، د. تەها رەسوڵ، خاوەنی كۆمەڵگەی پەروەردەیی مارگرێت، بڕیاریدا تەواوی قازانجی ساڵی خوێندنی (2026-2027)ی كۆمەڵگەكەی، پێشكەش بەنەخۆشخانەی هیوا بكات.

راشیگەیاند: ئەمە تەنها بەخشین نییە، بەڵكو چاندنی تۆوی هیوایە لەدڵی ئەو ئازیزانەی كە شەڕی مانەوەیان لەژیان دەكەن، هاوكات دەمانەوێت كلتورێك دروستبكەین بۆ ئەوەی كە دەستڕۆیشتووان و سەرمایەداران هاوكاری و كۆمەكی توشبووانی شێرپەنجەو لێقەوماوان بكەن.

هەرێز ئازاد حەسەن وتیشی: لەسەر راسپاردەی د. تەها رەسوڵ، هەر لەسەرەتای دامەزراندنی كۆمەڵگەی پەروەردەیی مارگرێت-ەوە، بەشێك لەخوێندكاران بە سكۆڵەر شیپی تایبەتی د. تەها رەسوڵ، لەكۆمەڵگەی پەروەردەیی مارگرێت دەخوێنن، كەبەشێكی زۆریان خوێندكارانی رۆژئاوای كوردستانن و كە لەكاتی ئاوارەبوونیاندا كۆمەڵگەی مارگرێت هاوكاریی كردوون درێژەیان بەخوێندن داوە، جگە لەوەی ژمارەیەكی زۆر خوێندكارمان كە ئێستا پۆلی 12 یان تەواو كردووەو بەرەو زانكۆ دەچن بەسكۆڵەر شیپی تایبەتی د. تەها رەسوڵ خوێندوویانە.

ئاماژەی بەوەشكرد: كۆمەڵگەی پەروەردەی مارگرێت، بەهاوكاری دەزگای خێرخوازی كەریمی عەلەكە، كە خاوەندارییەكەی هەر بۆ د. تەها رەسوڵ دەگەڕێتەوە، رۆژانەو مانگانەو ساڵانە هاوكاری بەسەر هەژاراندا دابەشدەكات و لەكاتی لێقەوماندا هاوكاریی پێشكەش بەلێقەوماوان دەكات.

كۆمەڵگەی پەروەردەی مارگرێت، لەساڵی 2009 بەشێوەی پەیمانگای پیشەیی دامەزراو لەساڵی 2013 ەوە باخچەو خوێندنگای مارگرێت كرایەوە، ساڵی 2022 ئامادەیی مارگرێت كرایەوەو لەئێستادا لەچوار بەشی سەرەكی پێكدێت، ئەویش دایەنگا، باخچەی ساوایان، خوێندنگەی بنەڕەتی و ئامادەییە، هاوكات 900 خوێندكار لەكواڵێتییەكی بەرزی خوێندندا لە كۆمەڵگەی پەروەردەی مارگرێت درێژە بەپڕۆسەی خوێندن دەدەن.

PUKMEDIA