زەیدی لەگەڵ بەرپرسانی تورکیا پرسی وەبەرهێنان و ئاو تاوتوێ دەکات

نوسینگەی راگەیاندنی سەرۆکوەزیرانی عیراق

سەردانی زەیدی بۆ تورکیا

عەلی زەیدی سەرۆکوەزیرانی عیراق بەسەردانێکی رەسمی گەیشتە تورکیا و پرسی ئاو و وەبەرهێنان و ئەمنی و ئابوری لەگەڵ بەرپرسانی ئەو وڵاتە تاوتوێ دەکات.

بەپێی نوسینگەی راگەیاندنی سەرۆکوەزیرانی عیراق، عەلی زەیدی سەرۆکوەزیرانی عیراق، بە سەردانێکی رەسمی گەیشتە تورکیا.
لە سەردانەکەیدا، زەیدی چاوی بە ڕەجەب تەیب ئەردۆغان سەرۆککۆمار و بەرپرسانی پلەباڵای ئەو وڵاتە دەکەوێت و چەندین پرسی جێی بایەخی هەردوو لا تاوتوێ دەکەن.

هاوکات، سەرۆکوەزیران، لە پۆستێکیدا کە لە پلاتفۆڕمی ئێکس بڵاویکردووەتەوە، ئاماژەی بەوەکردووە: لە سەردانەکەمان بۆ تورکیا باس لە پرسی وەبەرهێنان و ئاو و رێگەی گەشەپێدان دەکەین.

دەشڵێت: لەگەڵ تاوتوێکردنی پرسی ئابوری و ئەمنی  لەگەڵ هەوڵەکان بۆ فەراهەمکردنی سەقامگیری تاوتوێ دەکەین.

لەلایەکی دیکەوە، لەبارەی ڕێزگرتن لە سەروەریی خاک و ڕووبەڕووبوونەوەی تیرۆرەوە، زەیدی لە وتارێکیدا بۆ ئاژانسی هەواڵی ئەنادۆڵ ئاماژە بەوە دەکات، ئاسایشی عیراق و تورکیا لەسەر بنەمای ڕێزگرتنی دوولایەنە بۆ سەروەریی خاک و ڕووبەڕووبوونەوەی تیرۆر و تاوانە ڕێکخراوەکان، پێویستی بە هاوکارییەکی بەهێز هەیە، چونکە گەشەپێدان تەنیا لە سایەی ئاسایش و سەقامگیریدا گەشە دەکات.

ئەمەش لەکاتێکدایە، سەرۆکوەزیرانی عیراق، رۆژی 13ی7 سەردانی ئەمریکای کرد و پرسی ئابوری و وزە و رێککەوتن لەگەڵ کۆمپانیا ئەمریکییەکان تەوەری سەرەکی کۆبوونەوەکەی بوو، هەروەها رۆژی 23ی ئەم مانگە سەردانی تارانی کرد و پرسی ئەمنی و سنوورەكانی نێوان هەردوو وڵات لە كاتی ئاڵۆزییانەکاندا باس کران، بڕیاریشە لە چەند رۆژی داهاتوودا سەردانی سعودیە بکات.

PUKMEDIA