دەرباز کۆسرەت ڕەسوڵ: یەکڕیزی زامنی تێپەڕاندنی ئاڵەنگارییەکانە

تایبەت

وێنەیەکى سەردانەکە

دەرباز کۆسرەت ڕەسوڵ لە سۆرانەوە رایگەیاند: یەکڕیزی و خۆڕێکخستنەوەی ناوخۆیی، زامنی تێپەڕاندنی ئاڵەنگارییە سیاسییەکانی قۆناغەکەیە.

ئەمڕۆ شەممە 18ى7ى2026، لە چوارچێوەی بەسەرکردنەوە مەیدانییەکانی بۆ لەنزیکەوە ئاگاداربوون لە رەوشی ناوچەکە، دەرباز کۆسرەت ڕەسوڵ سەردانی مەڵبەندی (6)ی سۆرانی کرد و لەلایەن کاروان گەزنەیی، لێپرسراوی مەڵبەندەوە پێشوازییەکی گەرمی لێکرا.

کۆبوونەوەکە بە ئامادەبوونی بەشێک لە لێپرسراوی بەشەکان، لێپرسراوی کۆمیتەکان، ئەنجومەنی مەڵبەند و ژمارەیەک لە ریش‌سپی و پیاوماقوڵان و کەسایەتییە دیارەکانی سنووری ئیدارەی سەربەخۆی سۆران بەڕێوەچوو.

لە میانی کۆبوونەوەکەدا، دەرباز کۆسرەت ڕەسوڵ لە وتەیەکدا تیشکی خستە سەر هەستیاریی قۆناغەکە و بەرچاوڕوونی تەواوی دایە ئامادەبووان سەبارەت بەدوایین پێشهاتەکان و دۆخی سیاسیی ناوچەکە بەگشتی و عیراق و هەرێمی کوردستان بەتایبەتی.

لە وتەکانیدا جەختی لەوە کردەوە کە رووبەڕووبوونەوەی گۆڕانکارییە خێراکانی ناوچەکە، پێویستی بە هۆشیاریی سیاسی و یەکدەنگییەکی بەهێزی نیشتمانی هەیە، بۆ ئەوەی بتوانرێت دەستکەوتەکان بپارێزرێن و مافەکانی خەڵک دەستەبەر بکرێن.

هەروەها، رۆڵی مێژوویی و خەباتی نەپساوەی خەڵکی تێکۆشەری دەڤەری سۆرانی بەرز نرخاند و ئاماژەی بەوەدا کە مێژووی پڕ قوربانیدانی ئەم ناوچەیە، هاندەرێکی گەورەیە بۆ ئەوەی خزمەتکردنی هاووڵاتیان و گوێگرتن لە داواکارییەکانیان لە پێشینەی هەموو کارەکان بێت. لەم روانگەیەشەوە، پشتیوانی خۆی بۆ کار و بەرنامەکانی مەڵبەند و لێپرسراوی مەڵبەند دووپاتکردوە.

هەروەک، ئامادەبوونی کەسایەتی و ریش‌سپیانی ناوچەکەی وەک کۆڵەکەیەکی قایمی کۆمەڵایەتی و پشتیوانییەکی گرنگ بۆ سەرخستنی یەکێتی لەناوچەکە وەسف کرد.

لە کۆتاییدا، کاروان گەزنەیی و هەڤاڵانی مەڵبەند و ئامادەبووان، وێڕای دەربڕینی سوپاسگوزاری بۆ ئەم سەردانە، دووپاتیان کردەوە کە بە گوڕوتینێکی نوێوە درێژە بە کارە رێکخراوەییەکان دەدەن و وەک هەمیشە لە ئاست بەرپرسیارێتیی قۆناغەکەدا دەبن بۆ خزمەتکردنی زیاتری سنوورەکە.

PUKMEDIA