25 ملیار دینارو 200 هەزار دۆلارو چوار کیلۆ زێڕی تر دەستیبەسەرداگیرا

راگەیاندنی ئەنجومەنی دادوەری

پارەی دەستبەسەرداگیراو

دەسەڵاتی دادوەری عیراق، رایگەیاندووە: لە دۆسیەکەی عەدنان جومەیلیدا، 25 ملیار دینار و 200 هەزار دۆلار و چوار کیلۆ زێڕی تر دەستیبەسەردا گیراوە.

دادوەرى لێکۆڵینەوەی دادگای تاوانەکانی بەرەنگاربوونەوەی گەندەڵی ناوەندی لە رونکردنەوەیەکدا رایگەیاند: ئەمڕۆ پێنجشەممە 16-7-2026، لە چوارچێوەی ئەو لێکۆڵینەوانەی کە ئێستا لە دۆسیەی تۆمەتباری دەستبەسەرکراو عەدنان جومەیلی بریکاری پێشووی وەزارەتی نەوت بۆ کاروباری پاڵاوتندا بەڕێوەدەچن، بڕێکی تر پارە و زێڕ دەستیان بەسەردا گیراوە.

ئاماژەی بەوەشکرد: بەشێک لەو پارە دەستبەسەرداگیراوە لەلایەن چەند کەسێک شاردراوەتەوە، لە کاتێکدا بەشەکەی تری لە ناوەوەی دیوارەکانی چەند خانووێکدا بە شاراوەیی دۆزرایەوە،  کۆی گشتیی ئەو پارانەی کە ئەمڕۆ دەستیان بەسەرداگیراوە (25) ملیار دیناری عیراقی و 200 هەزار دۆلاری ئەمریکی و جگە لە (4) کیلۆگرام لە زێڕ و خشڵە.

دادوەرەکە ئەوەشی خستەروو: ئەو لێکۆڵینەوانەی کە لە دۆسیەی تۆمەتبارەکەدا بەڕێوەدەچن، هێشتا بەردەوامن لە چوارچێوەی ڕێکارەکانی بەدواداچوون بۆ دەرئەنجامەکانی تاوانەکە و ئەو کەسانەی کە تێیدا تێوەگلاون.

PUKMEDIA