وتەبێژی حکومەتی عیراق: سبەینێ سەرۆک وەزیران بەرەو واشنتن بەرێدەکەوێت

واع

حەیدەر عەبوودی وتەبێژی حکومەتی عیراق

وتەبێژی حکومەتی عیراق ڕایگەیاند؛ سبەینێ 13ی7ی2026 عەلی زەیدی سەرۆکوەزیرانی عیراق بەسەرۆکایەتی وەفدێکی باڵا بەسەردانێکی رەسمی بەرەو واشنتۆنی پایتەختی ئەمریکا بەڕێ دەکەوێت، ئامانجیش لەسەردانەکەی بۆ پەرەپێدانی کەرتی ئابوری و وزە و ژێرخانی وڵات و تەکنەلۆژیاییە.

حەیدەر عەبوودی وتەبێژی حکومەتی عیراق، لە کۆنگرەیەکی ڕۆژنامەوانیدا ڕایگەیاند: ئەم سەردانەکە گرنگییەکی زۆری هەیە، بەتایبەت کە لە کات و بارودۆخێکی هەستیاری ناوچەکەدا ئەنجامدەدرێت.

 ئاماژەی بەوەش کرد: سەرۆک وەزیران زنجیرەیەک کۆبوونەوەی گرنگ لەگەڵ دۆناڵد ترەمپ سەرۆکی ئەمریکا و بەرپرسان و دامەزراوە ئابووری و داراییەکان ئەنجام دەدات.

حەیدەر عەبوودی ڕوونیکردەوە؛ جیاوازی ئەم سەردانە لە سەردانەکەی  پێشووتر ئەوەیە کە تەوەری بنەڕەتییەکەی بریتییە لە کەرتی ئابوری.

وتیشی: هیچ گۆڕانکارییەک لە ڕێککەوتنی چوارچێوەی ستراتیژیدا ناکرێت، بەڵکو تەواوی ئەو لێکتێگەیشتن و ڕێککەوتنانەی ئیمزا دەکرێن لەسەر بنەمای ئەم چوارچێوەیە دەبن، بەمەش شێوازی پەیوەندییەکانی نێوان بەغداد و واشنتۆن لە قۆناغی "بەڕێوەبردنی قەیرانەکان"ەوە دەچێتە قۆناغی "هاوبەشی ئابوری درێژخایەن".

ئاشکراشی کرد: لە سەردانەکەدا چەندین یاداشتی لێکتێگەیشتن لە بوارەکانی نەوت و گازدا لە چوارچێوەی "سندوقی گەشەپێدان و وزەی عیراقی-ئەمریکی"دا ئیمزا دەکرێن.
سەبارەت بە پرسی ناوخۆیی و تەواوکردنی کابینەی حکومەتیش، وتەبێژی حکومەتی عیراق، ڕوونیکردەوە: ئەم بابەتە پەیوەستە بە ڕێککەوتنی سیاسییەکانەوە، بەڵام حکومەت لە ڕێگەی ئەو وەفدانەوە کە سەردانی ئەمریکا دەکات، چارەسەری کەمکوڕییەکانی نێو کابینەکە دەکات.

 لە سەردانەکەیدا، سەرۆکوەزیرانی عیراق، پێنج پرسی گرنگ و جێی بایەخی هەردوو لا، لەگەڵ لێپرسراوانی ئەمریکا تاوتوێ دەکات، کە بریتین لە پرسی ئابوری، کەرتی وزە، پەرەپێدانی پرۆژەکانی ژێرخانی وڵات، کەرتی کشتوکاڵ، لایەنی تەکنەلۆژیا.

PUKMEDIA