باڵیۆزی فنلەندا: سەرۆک مام جەلال رۆڵی گەورەی لە بونیادنانەوەی عیراقدا گێڕا

مەکتەبی سکرتارییەت

ئەنتی بوتکونن باڵیۆزی فنلەندا لە عیراق

رۆژی 7ی7ی2026، ئەنتی بوتکونن باڵیۆزی فنلەندا لە عیراق، سەردانی مەزاری سەرۆک مام جەلال-ی کرد و لە لایەن مەکتەبی سکرتارییەتی سەرۆک مام جەلال ـوە بە بەگەرمی پێشوازیکرا .

دوای دانانی تاجەگوڵینەی رێز و وەفاداری، ئەنتی بوتکونن لە دەفتەری یادەوەرییەکاندا باسی لە رۆڵ و کاریگەری سەرۆک مام جەلال کرد وەک سەرکردەیەکی گەورەی گەلی کورد کە شانبەشانی خەبات و تێکۆشانەکانی بۆ گەلەکەی رۆڵی گەورەی گێڕا لە بونیاد نانەوەی عیراقی نوێدا.

لە بەشێکی دیکەی وتەکانیدا ئەنتی بوتکونن بە بایەخەوە باسی لە هۆنراوە بەناوبانگەکەی شاعیری گەورەی نەتەوەیی کورد کرد کە دەڵێت “مەرگ و ژین میسلی سێبەر و تاوە ئەوی دەمێنێ باقی، هەر ناوە“ وتی ئەم دەقە رێک بۆ سەرۆک مام جەلال راستە چونکە هەمووان دەمرین بەس گرنگە ناوەکەت دوای خۆت چۆن بە جوانی و گەورەی دەمێنێتەوە .

لە بەرامبەردا ؛ مەکتەبی سکرتارییەتی سەرۆک مام جەلال سوپاسی سەردانەکەی بەڕێز ئەنتی بوتکونن باڵیۆزی فنلەندا لە عیراق کردوو بە رێزەوە لە پەیوەندی دێرینی گەلی کورد و دەوڵەتی فنلەندا دەڕوانین وەک دەوڵەتێک کە هەمیشە نزیک بوون لە خەم و ئازارەکانی میللەتەکەمان .

PUKMEDIA