قوباد تاڵەبانی لەگەڵ وەزیرانی دەرەوە و پیشەسازیی ئەلبانیا کۆدەبێتەوە

راگەیاندنی قوباد تاڵەبانی

قوباد تاڵەبانی لەگەڵ وەزیرانی دەرەوە و پیشەسازیی ئەلبانیا کۆدەبێتەوە

لە میانەی سەردانەكەیدا بۆ ئەلبانیا، قوباد تاڵەبانی، جێگری سەرۆكوەزیران بە جیا لەگەڵ هەر یەكە لە فێریت هۆكسا، وەزیری كاروباری دەرەوە و ئەوروپای ئەلبانیا و ئێنێیا كاراكاچی، وەزیری پیشەسازی و وزەی ئەلبانیا كۆبووەوە.

لە كۆبوونەوەی لەگەڵ وەزیری دەرەوەی ئەو وڵاتەدا گفتوگۆكرا لەبارەی گرنگیی كاری هاوبەش بۆ بەهێزكردنی پەیوەندیی سیاسی و ئابووری نێوان هەردوو وڵات و بڕیادرا لەسەر پێكهێنانی گروپێكی كاری هاوبەش لە پسپۆڕانی هەردوولا بۆ ئەوەی زەمینە بۆ دروستكردنی پەیوەندیی لە بوارەكانی گەشتوگوزار و بازرگانیدا بڕەخسێنن و هەروەها هەماهەنگی دروست بكەن بۆ ئاڵوگۆڕی پسپۆڕیی لە بوارەكانی بە ئەلیكترۆنیكردنی دامەزراوەكان و بەكارهێنانی ژیریی دەستكرد لە خزمەتگوزارییەكاندا.

لە كۆبوونەوەش لەگەڵ وەزیری پیشەسازی و وزەی ئەلبانیادا، باس لە ئەزمونی ئەو وڵاتە كرا لە چۆنییەتی پەرەپێدانی كەرتی وزە و بە تایبەتیش وزەی نوێبووەوە. لەمبارەیەشەوە جەخت كرایەوە لەسەر كاركردن بۆ ئاڵوگۆڕی ئەزموون لەنێوان هەردوولادا.

جێگری سەرۆكوەزیران بە پێویستی زانی هێڵی ئاسمانی راستەوخۆ لەنێوان سلێمانی و تیرانادا بكرێتەوە بۆ ئەوەی یارمەتیدەربێت لە دروستكردنی پەیوەندیی گەشتیاری و كولتووری و بازرگانی لەنێوان هەردوو وڵاتدا.

PUKMEDIA