له‌تیف نێروه‌یی: رێككه‌وتنی یه‌كێتی و نه‌وه‌ی نوێ له‌پێناو به‌رژه‌وه‌ندی گشتییه‌

PUKMEDIA

لەتیف نێروەیی لێپرسراوی بۆردی راگەیاندنی یەکێتیی نیشتمانیى کوردستان

لەتیف نێروەیی رایگەیاند: لەگەڵ ئیمزاکردنی رێککەوتننامەی هاوپەیمانیی هاوسەنگی و بووژانەوە، لە نێوان یەکێتیی نیشتمانیی کوردستان و جووڵانەوەی نەوەی نوێدا ئەمڕۆ هەرێمی کوردستان وەچەرخانێکی سیاسی و ئیداریی بەخۆیەوە دەبینێت.

لەتیف نێروەیی، لێپرسراوی بۆردی راگەیاندنی یەکێتی بە PUKMEDIAی راگەیاند: ئەم هاوپەیمانێتییە وەک پێویستییەکی خێرا دێت بۆ گێڕانەوەی هاوسەنگیی سیاسی، کە پێشتر نەبوونی ئەم هاوسەنگییە ببووە هۆی پاشەکشەی پێگەی هەرێم لە ناوخۆدا، بەتایبەتی لە ناوچە دابڕێندراوەکاندا، جگە لە کاریگەرییەکەی لەسەر ئامادەیی هەرێم لە بەغداد و کۆڕ و کۆبوونەوە نێودەوڵەتییەکان.

وتیشی: چاوەڕوان دەکرێت ئەم هاوسەنگییە ببێتە هۆی بوژانەوەی خزمەتگوزاری و ئابووری و پەرەپێدانی پەیوەندییەکان لەگەڵ حکومەتی فیدراڵ و ناوخۆی هەرێم و نێودەوڵەتیش، ئاماژە راستییەکان و لێدوانی هەردوولاش ئەوە پشتڕاست دەکەنەوە کە ئەم ڕێککەوتنە خزمەت بە بەرژەوەندیی باڵای هەرێم دەکات و دژی هیچ لایەنێک نییە.

ئاماژەی بەوەشکرد: لە ڕووی مێژووییەوە، یەکێتی هەمیشە دەستپێشخەر بووە بۆ هەنگاوی ستراتیژی لە بەرژەوەندیی هەرێم، هەر لە ڕێککەوتنی ستراتیژیی پێشووی لەگەڵ پارتی دیموکراتی کوردستان و رێککەوتنی لەگەڵ بزووتنەوەی گۆڕان بۆ ڕووبەڕووبوونەوەی ئاڵۆزییەکانی سلێمانی، تا دەگاتە ئەم هاوبەشییەی ئێستا لەگەڵ دیارترین هێزی ئۆپۆزسیۆندا.

ئەوەشی ڕوونکردەوە: گرنگیی ئەم هەنگاوە لەوەدایە کە دوو لایەنەکە (یەکێکیان لە دەسەڵات و ئەوی تریان لە ئۆپۆزسیۆن) کۆدەکاتەوە، کەچەندین ساڵە رووداوی وا دووبارە نەبووەتەوە، ئەمەش دەبێتە کۆڵەکەیەک بۆ یەکخستنی ناوماڵی کوردی، لە کۆتاییشدا، ئەم هاوپەیمانێتییە هەوڵ نادات مەرجی پێشوەختە لە دانوستانەکانی پێکهێنانی حکومەتدا بسەپێنێت، بەڵکو لە شایستەییەوە دەستپێدەکات بۆ داواکردنی یەکێک لە پۆستە دەسەڵاتدارەکانی هەرێم.

PUKMEDIA