دەستگیركردنی گەندەڵكاران نرخی دۆلاری دابەزاند

PUKMEDIA

دۆلار و دينار

ماوەی دوو رۆژە نرخی دۆلار بەشێوەیەكی بەرچاو بەراورد بە رۆژانی رابردوو دابەزیوەو ئەندامێكی ئەنجومەنی بازاڕی شەوكەتی مەلا-ش دەڵێت: دەستگیركردنی گەندەڵكاران نرخی دۆلاری دابەزاندووە.

لوقمان حەسەن سەعید، ئەندامی ئەنجومەنی بازاڕی شەوكەتی مەلا، كەتایبەتە بە ئاڵوگۆڕی دراو لەسلێمانی، بەوێبسایتی رەسمی یەكێتیی نیشتمانیی كوردستان PUKMEDIA ی راگەیاند: ئەمڕۆ دوو شەممە 29ی 6ی 2026، نرخی دۆلار بۆ 153 هەزار و 900 دینار دابەزی، لەكاتێكدا لەچەند رۆژی رابردوودا نرخەكەی گەیشتە 159 هەزار و 900 دینار، هۆكاری سەرەكی دابەزینی نرخی دۆلاریش دەگەڕێتەوە بۆ ئەو هەڵمەتەی حكومەتی عیراق دژی گەندەڵكاران گرتوویەتییەبەر.

راشیگەیاند: دەستگیركردنی دەیان تۆمەتباری گەندەڵی لەچوارچێوەی ئۆپەراسیۆنی (هێرشی بەرەبەیان)دا، كاریگەری راستەوخۆی لەسەر دابەزینی نرخی دۆلار بەرامبەر بەدیناری عیراقی هەبوو، چونكە پاش دەستبەسەرداگرتنی ئەو دۆلارانە لەلایەن حكومەتی عیراقەوە، هاووڵاتیان پێیانوایە دووبارە لەبازاڕەكانی ئاڵوگۆڕی دراودا دەخرێنەڕوو، بەمەش خستنەڕوو زیاد دەكات و خواست كەمدەبێتەوە، ئەوەش راستەوخۆ نرخی دۆلاری بەرامبەر بەدینار دابەزاند.

ئەمەش لەكاتێكدایە، ماوەی چەند رۆژێكە حكومەتی عیراق، هەڵمەتێكی بەرفراوانی روبەڕوبوونەوەی گەندەڵی لەچوارچێوەی ئۆپەراسیۆنی (هێرشی بەرەبەیان)دا دەستپێكردووە، ئەمڕۆش حەیدەر عەبودی، وتەبێژی حكومەتی عیراق رایگەیاند: تائێستا 68 تۆمەتبار دەستگیركراون و گەڕان بەدوای تێوەگلاوانی دیكەشدا بەردەوامە.

PUKMEDIA