بەغدادو هەرێم تاوتوێی یەكخستنی رێكارە گومرگییەكان و كۆكردنەوەی داهاتی دەروازەكان دەكەن

واع

كۆبوونەوەی ئەنجومەنی وەزاری بۆ ئابووری عیراق

ئەنجومەنی وەزاری بۆ ئابووری عیراق، بە سەرۆكایەتی فالح ساری و بە ئامادەبوونی وەفدێكی باڵای هەرێمی كوردستان، بڕیاریدا بەپێكهێنانی لێژنەیەكی هاوبەش بۆ رووپێوكردنی خاڵە سنوورییەكانی هەرێم، هاوكات هەردوولای راسپارد بۆ یەكخستنی لێخۆشبوونە گومرگییەكان و دۆزینەوەی میكانیزمێكی هاوبەش بۆ كۆكردنەوەی داهاتی دەروازەكان.

ئەمڕۆ دوو شەممە 29ی 6ی 2026، بە سەرۆكایەتی فالح ساری، وەزیری دارایی و وەزیری پلاندانان بەوەكالەت، پێنجەمین كۆبوونەوەی ئەنجومەنی وەزاری بۆ ئابووری بەڕێوەچوو، كەتێیدا وەفدێكی باڵای حكومەتی هەرێمی كوردستان بە سەرۆكایەتی وەزیری دارایی هەرێم و لێپرسراوانی دەروازە سنوورییەكان و گومرك و باجی هەردوولا بەشداربوون، بەمەبەستی تاوتێكردنی یەكخستنی رێكارە گومركی و باجییەكان و جێبەجێكردنی سیستمی ئەلیكترۆنی "ئەسیكۆدا".


لەكۆبوونەوەكەدا، بڕیار لەسەر پێكهێنانی لیژنەیەكی هاوبەش بەسەرۆكایەتی سەرۆكی دەستەی دەروازە سنوورییە فیدراڵییەكان درا، ئەركی ئەم لیژنەیەش ئەنجامدانی رووپێوێكی گشتگیرە بۆ خاڵە سنوورییەكان و سەردانیكردنی دەروازە ناڕەسمییەكانی هەرێم، بەمەبەستی بەڕەسمی ناساندنی ئەو دەروازانەی بەپێی پێوەرو ستانداردەكان شیاون بكرێنە دەروازەی رەسمی، هاوكات داخستنی دەستبەجێی سەرجەم ئەو دەروازەو خاڵە سنوورییە ناڕەسمییانەی كەمەرجەكانیان تێدا نییە.

هەروەها لەپێناو رێكخستنی مامەڵە داراییەكاندا، ئەنجومەنەكە وەزارەتی دارایی فیدراڵی راسپارد كە بە هەماهەنگی لەگەڵ وەزارەتی دارایی هەرێم نامیلكەیەكی یەكگرتوو ئامادە بكەن، كە سەرجەم لێخۆشبوون و ئاسانكارییە گومرگییەكان لەخۆبگرێت. ئەم نامیلكەیە بەرزدەكرێتەوە بۆ ئەنجومەنی وەزیرانی فیدراڵی بە مەبەستی پەسندكردنی و كارپێكردنی لە سەرجەم دەروازە سنوورییەكان بەبێ جیاوازی.

لە كۆتاییدا، ئەنجومەنەكە رێككەوت لەسەر بەرزكردنەوەی پێشنیارە یاسایی و تەكنیكییەكانی هەردوولا بۆ ئەنجومەنی وەزیرانی فیدراڵی، بەمەبەستی یەكلاكردنەوەی میكانیزمی كۆكردنەوەی داهاتە داراییەكان لەدەروازە سنوورییەكانی هەرێمی كوردستان و یەكخستنیان لە چوارچێوەی یەك سیستمی هاوبەشدا.

PUKMEDIA