حكومەتی عیراق هەژمارێكی بانكی بۆ پارە دزراوەكان دەكاتەوە

واع

حەیدەر عەبودی، وتەبێژی حكومەتی عیراق

حكومەتی عیراق كردنەوەی هەژمارێكی بانكی تایبەت بە كۆكردنەوەی ئەو پارانەی لەدۆسیەكانی دەوڵەمەندبوونی نایاسایی گەڕێندراونەتەوە رادەگەیەنێت، وتەبێژی حكومەتیش ئاشكرای دەكات كە لە چوارچێوەی ئۆپەراسیۆنی (هێرشی بەرەبەیان)دا دەیان تۆمەتباری گەندەڵی دەستگیركراون، هاوكات دڵنیایی دەداتە فەرمانبەرانی هەرێمی كوردستان كە مووچەكانیان هاوشێوەی عیراق خەرج دەكرێت.

حەیدەر عەبودی، وتەبێژی حكومەتی عیراق، ئەمڕۆ دوو شەممە 29ی 6ی 2026، لەكۆنگرەیەكی رۆژنامەوانیدا رایگەیاند: عەلی زەیدی، سەرۆك وەزیرانی عیراق، رێنمایی وەزارەتی دارایی كردووە بە كردنەوەی هەژمارێكی بانكی تایبەت بۆ كۆكردنەوەی ئەو پارانەی كە لە تێوەگلاوانی دۆسییەكانی دەوڵەمەندبوونی نایاسایی وەرگیراونەتەوە.

ئاماژەی بەوەشكرد: كە حكومەت لەسەر بنەمای پابەندبوونی دەستووری خۆی بۆ پاراستنی مۆڵكی گشتیی بەردەوام دەبێت و روانگەیەكی گشتگیری هەیە بۆ چاكسازیی دامەزراوەیی، لەكاتێكدا گێڕانەوەی مۆڵكی گشتیی بەرپرسیارێتییەكە كە لەژێر كاریگەریی كەسەكان و بارودۆخەكاندا نییە و ستراتیژی ئێستامان بۆ دژایەتیكردنی گەندەڵی هاوشێوەی قۆناغەكانی رابردوو نییە.

وتەبێژی حكومەتی عیراق ئەوەشی خستەڕوو: ئۆپەراسیۆنی (هێرشی بەرەبەیان) بۆ سەر تۆمەتبارانی گەندەڵی بەردەوام دەبێت و لەچوارچێوەی ئەم ئۆپەراسیۆنەدا تائێستا 68 تۆمەتبار دەستگیركراون و گەڕان بەدوای تێوەگلاوانی دیكەشدا بەردەوامە، هاوكات ئۆپەراسیۆنەكە بەهیچ شێوەیەك ناوەستێت و دانپێدانانی دەستگیركراوەكان حكومەت دەگەیەنێتە چەندین تۆڕی دیكەی گەندەڵی.

حەیدەر عەبوودی وتیشی: 21 تۆمەتباری دیكە لە هەڵمەتی بەرەنگاربوونەوەی گەندەڵیدا دەستگیركراون و هێشتا گەڕان بەدوای تێوەگلاواندا بەردەوامە، هاوكات رۆژی 21ـی ئەیلول، دوا مۆڵەت دەبێت بۆ رادەستكردنی چەك و لەهەمان كاتیشدا وادەی كشانەوەی هێزەكانی هاوپەیمانی نێودەوڵەتییە لە عیراق.

راشیگەیاند: دڵنیایی دەدەینە فەرمانبەرانی هەرێمی كوردستان، كە رێككەوتن و لێكتێگەیشتنی باش لەنێوان بەغداد و هەولێردا هەیە سەبارەت بە موچەی موچەخۆرانی هەرێمی كوردستان، پابەندبوونێكی نەگۆڕ و جێگیر هەیە بۆ دابینكردن و مسۆگەركردنی شایستە داراییەكانیان و لەگەڵ عیراق مووچەی هەرێمی كوردستانیش خەرج دەكرێت.

PUKMEDIA