یەکێتی داوا لەچین دەکات دەرفەتی زیاتری خوێندن بۆ هەرێم بڕەخسێنێت

تایبەت

کۆبوونەوەی لێپرسراوی پەیوەندییەکانی دەرەوەی یەکێتی لەگەڵ وەفدێکی کۆماری میللی چین

لێپرسراوی پەیوەندییەکانی دەرەوەی یەکێتیی نیشتمانیی کوردستان، پێشوازی لە وەفدێکی باڵای زانستی چین کرد بۆ پەرەپێدانی هاوکارییە زانستییەکان و هەردوولا جەختیان لەسەر بەردەوامبوونی هاوکاری و دروستکردنی پردی پەیوەندییە زانستییەکان کردەوە، بە مەبەستی خزمەتکردن و پێشکەوتنی بواری خوێندن و توێژینەوە و بەهێزکردنی پەیوەندییە ئەکادیمییەکانی نێوان هەرێمی کوردستان و کۆماری میللی چین.

دوێنێ 16ی6ی2026، دارا خەیلانی ئەندامی سەرکردایەتی و لێپرسراوی پەیوەندییەکانی دەرەوەی یەکێتیی نیشتمانیی کوردستان، پێشوازی لە وەفدێکی باڵای پڕۆفیسۆر و دکتۆر و شارەزایانی زانستی زانکۆکانی کۆماری میللی چین کرد، کە بۆ مەبەستی پەرەپێدانی پەیوەندییە زانستی و ئەکادیمییەکان سەردانی شاری سلێمانییان کردبوو.

لە کۆبوونەوەکەدا، هەڤاڵان دکتۆر مۆفەق خالید یاریدەدەری لێپرسراوی مەڵبەندی دراساتی گشتی و دکتۆر ئومێد رەفیق لێپرسراوی ناوەندی توێژینەوەی مەڵبەندی دیراسات ئامادەیبوون، گفتوگۆ لەسەر گرنگی بەهێزکردنی هاوکارییە زانستی و ئەکادیمییەکانی نێوان هەرێمی کوردستان و کۆماری میللی چین و خوێندنی باڵا و توێژینەوەی زانستی و گۆڕینەوەی ئەزموون و شارەزاییەکان کرا.

هاوکات، داوا لە وەفدەکەی چین کرا هاوکاریی زیاتر بکەن لە دابینکردنی دەرفەتی خوێندن بۆ خوێندکارانی هەرێمی کوردستان بە تایبەتی لە ئاستی ماستەر و دکتۆرا، لە کۆتایشدا هەردوولا جەختیان لەسەر بەردەوامبوونی هاوکاری و دروستکردنی پردی پەیوەندییە زانستییەکان کردەوە، بە مەبەستی خزمەتکردن و پێشکەوتنی بواری خوێندن و توێژینەوە و بەهێزکردنی پەیوەندییە ئەکادیمییەکانی نێوان هەرێمی کوردستان و کۆماری میللی چین.

PUKMEDIA