فیلمی دیکۆمێنتاریی "دادە؛ داستانی پەنهانی ژنێکی خەباتگێڕ" لە سۆران نمایشکرا

PUKMEDIA

خاتوو هێرۆ ئیبراهیم ئەحمەد

لە درێژەی چالاکییە هونەری و رۆشنبیرییەکاندا، بە ئامادەبوونی کاروان گەزنەیی، لێپرسراوی مەڵبەندی 6ی سۆران، ستافی مەڵبەند، کادیرانی حزبی و ژمارەیەکی بەرچاو لە تێکۆشەران، کەسایەتییە رۆشنبیرییەکان و جەماوەری دەڤەرەکە، رێوڕەسمی نمایشکردنی فیلمی دیکۆمێنتاریی "دادە؛ داستانی پەنهانی ژنێکی خەباتگێڕ" لە ئیدارەی سەربەخۆی سۆران بەڕێوەچوو.

لە میانی چالاکییەکەدا، کاروان گەزنەیی، لێپرسراوی مەڵبەندی 6ی سۆران، تیشکی خستەسەر رۆڵی مێژوویی و پێگەی بەرزی خاتوو هێرۆ ئیبراهیم ئەحمەد و رایگەیاند: "ئێمە ئەمڕۆ لێرە کۆبووینەتەوە بۆ بینینی بەرهەمێک کە تەنها گێڕانەوەیەکی ئاسایی ژیانی کەسایەتییەک نییە، بەڵکوو دۆکۆمێنتکردن و تۆمارێکی زیندووی مێژووی تێکۆشان، خۆڕاگری و هەستانەوەی نەتەوەیەکە. ئەم فیلمە گوزارشتە لە مێژووی پڕ لە سەروەریی ژنە سەرکردە و پێشمەرگە، دادە هێرۆخان."

لە درێژەی وتەکانیدا، لێپرسراوی مەڵبەند ئاماژەی بەوەدا، کە لە قۆناغە سەختەکانی خەباتی شاخدا، هێرۆخان سەلماندی کە ژنی کورد توانای هەیە چیاکانی کوردستان بکاتە مەقەڕی بەرگری و بە بەکارهێنانی کامێراکەی وەک چەکێکی کاریگەر، دەنگی رەوای گەلەکەمان بە جیهان بگەیەنێت.

هەروەها روونیکردەوە: "دادە هێرۆ نەک تەنها هاوسەر و هاوسەنگەری رێگەی سەختی سەرۆک مام جەلال بووە، بەڵکوو خۆی بە تەنها شۆڕشگێڕێک بووە کە کامێراکەی سەر شانی، بووەتە چاوی شۆڕش و پارێزەری ئەرشیفی نەهامەتی و نەبەردییەکانی هێزی پێشمەرگەی کوردستان."

کاروان گەزنەیی لە بەشێکی دیکەی وتارەکەیدا، رۆڵی دادە هێرۆی لە قۆناغی دوای راپەڕین و قۆناغی ئاوەدانکردنەوەی هەرێمی کوردستان بەرز نرخاند و وتی: "لە کاتی بنیاتنانەوەی نیشتماندا، کۆڵەکەیەکی پتەوی یەکێتیی نیشتمانیی کوردستان و هێمایەکی درەوشاوەی نەتەوەکەمان بووە بۆ داکۆکیکردن لە مافەکانی ژنان و پاراستنی منداڵان.

دامەزراندنی رێکخراوەکانی تایبەت بە منداڵان و پاڵپشتییە بێسنوورەکانی بۆ کلتوور و هونەر و نووسەران، هونەرمەندان و میدیای نیشتمانی، وایکرد ببێتە دایکی مەعنەویی بزووتنەوەی رۆشنبیری و خەمخۆری راستەقینەی پاراستنی کەلەپووری نەتەوەییمان.

لە کۆتایی وتارەکەیدا، لێپرسراوی مەڵبەندی 6ی سۆران دەستخۆشییەکی گەرمی ئاراستەی بەرهەمهێنەرانی فیلمەکە کرد.

PUKMEDIA