خولی بیری میانڕەوی و رووبەڕوبوونەوەی توندڕەوی کۆتایی هات

مەڵبەندی دیراساتی گشتی

مەراسیمی کۆتاییهاتنی خولی بیری میانڕەوی و رووبەڕوبوونەوەی توندڕەوی

دوای دوو ساڵ لە کردنەوەی خولی خولی بیری میانڕەوی و رووبەڕوبوونەوەی توندڕەوی ‏بۆ زیاتر لە 50 کادیر لە تەواوی شار و شارۆچکەکان لە مەڵبەندی دیراساتی گشتی، ئەمڕۆ ‌‏10/6/2026 لە ئەکادیمیای پەروەردە و پەرەپێدانی کادیران بڕوانامەیان پێ بەخشرا. ‏

بە ئامادەبوونی د.یوسف گۆران لێپرسراوی مەڵبەندی دیراساتی گشتی و ‏د.مۆفەق خالد یاریدەدەری لێپرسراوی مەڵبەند وسەرپەشتیاری خول، جەمال ‏حسێن توێژەری بوارەكە ، د. ئومێد رفیق لێپرسراوی ناوەندی توێژینەوە و نەجمەدین فەقێ عەبدوڵڵا لێپرسراوی بۆردی بیر و ‏هۆشیاری و بارام مجیدخان، مەراسیمی دەرچووانی خولی بیری میانڕەوی و رووبەڕوبوونەوەی توندڕەوی بە ‏سەرکەوتووی کۆتایی هات و بڕوانامەیان پێ بەخشرا. ‏

لە وتەیەکدا، د.یوسف گۆران پیرۆزبایی لە بەشداربووانی خولەکە کرد و وتی: ‏کردنەوەی ئەم خولە گرنگییەکی زۆری بۆ کادیرانمان لە ئورگان و هەموو ئەو شوێنانەش ‏هەیە کە تیایدا کار دەکەن. بۆیە گرنگە هەموو ئەوەی لەم بوارەدا خوێندووتانە بتوانن لەپێناو ‏ئاشتی و پێکەوە ژیاندا بەکاریبهێنن.‏

ئەوەشی خستەڕوو، کە هێشتا بیری توندڕەوی لە ناوچەکەدا لە بەرەودایە و مەترسییە بۆ ‏سەر ئاشتی و سەقامگیری، بۆیە لەڕێگەی کردنەوەی ئەم جۆرە خولانەوە دەتوانین رێگری ‏لەم جۆرە بیرکردنەوەیە بگرین و کار لەسەر پێکەوە ژیانی هەمەلایەنەی هەموو چین و ‏توێژەکان بکەین.‏

دواتر جەمال حسێن سوپاسی مەڵبەندی دیراساتی گشتی کرد بۆ ‏دەستپێشخەریی کردنەوەی ئەم خولە و وتی: بەهیوام کردنەوەی ئەم خولە توانیبێتی ئاستی ‏تێگەیشتنی کادیرانمان لە بواری رووبەڕووبوونەوەی توندڕەوی بردبێتە ئاستێکی ترەوە، ‏چونکە بوارێکی فراوان و فرە رەهەندە و پێویستی بە خوێندنەوە و بەدواداچوونێکی ‏بەردەوام هەیە. ‏

PUKMEDIA