قوباد تاڵەبانی: یەكێتی لەسەر ئاستی نێودەوڵەتی پێگەیەكی بەهێزی هەیە

راگەیاندنی قوباد تاڵەبانی

كۆبوونەوەی قوباد تاڵەبانی لەگەڵ لێپرسراو و ئەندامانی ئەنجومەنی مەڵبەندی هەڵەبجەی یەكێتی

قوباد تاڵەبانی، لێپرسراویی مەكتەبی سكرتارییەتی سەرۆك مام جەلال لە میانەی سەردانەكەیدا بۆ پارێزگای هەڵەبجە لەگەڵ لێپرسراو و ئەندامانی نوێی ئەنجومەنی مەڵبەندی هەڵەبجەی یەكێتیی نیشتمانیی كوردستان كۆبووەوە.

لە دەستپێكی كۆبوونەوەكەدا كە رۆژی 8ی 6ی 2026، بەڕێوەچوو بەبۆنەی دەستبەكاربوونی لێپرسراو و ئەندامانی نوێی ئەنجومەنی مەڵبەندەوە، قوباد تاڵەبانی پیرۆزبایی لێكردن و هیوای خواست ئەم تیمە نوێیە بتوانن پەیوەندییەكی توندوتۆڵتر لەگەڵ دانیشتووانی هەڵەبجە دروست بكەن و مەڵبەند بكەنە ماڵی هەموو چین و توێژەكان و دەنگ و داواكارییەكانیان بگەیەننە لایەنە پەیوەندیدارەكان.

لە بەشێكی كۆبوونەوەكەدا قوباد تاڵەبانی ئاماژەی بە دۆخ و پێگەی ئێستای یەكێتی كرد و رایگەیاند: یەكێتی بە سەركردایەتی سەرۆك بافڵ جەلال تاڵەبانی لەسەر ئاستی كوردستان و عیراق و نێودەوڵەتیشدا شوێن و پێگەیەكی بەهێزی بۆخۆی دەستەبەر كردووە و رۆژ لە دوای رۆژیش بەهێزتر دەبێت و زیاتر حیساب بۆ سیاسەت و هەڵوێستی یەكێتی دەكرێت.

هەر لەم چوارچێوەیەدا لێپرسراویی مەكتەبی سكرتارییەتی سەرۆك مام جەلال بە پێویستیی زانی ئۆرگان و رێكخستەكانی یەكێتی شێوازی كاركردنی خۆیان لەگەڵ ئەم دۆخە نوێیەدا بگونجێنن و زیاتر لە هەر كاتێكی دیكە بچنە ناو خەڵكەوە، چوونكە یەكێتی هێز و پێگە و توانای خۆی لە كۆمەڵانی خەڵكی كوردستانەوە وەردەگرێت، هەتا پێگەی یەكێتی لەناو خەڵكدا بەهێزتر بێت باشتر دەتوانێت نوێنەرایەتی خواست و ئیرادەی كۆمەڵانی خەڵك بكات لەسەر ئاستی كوردستان و عێراق و ناوەندە نێودەوڵەتییەكاندا.

PUKMEDIA