حاجییانی کوردستان بەڕێگای وشکانی دەگەڕێنەوە

PUKMEDIA

گەڕانەوەی حاجییان بەڕێگەی وشکانی/ئەرشیف

دوای سەرهەڵدانەوەی گرژی و ئاڵۆزییەکانی نێوان ئیسڕائیل و ئێران و راگرتنی گەشتی بەشێک لەفڕۆکەخانەکان و لەنێویاندا فڕۆکەخانەی عیراق، دەنگۆی دروستبوونی ئاستەنگ لەبەردەم گەڕانەوەی حاجیانی هەرێمی کوردستان بڵاوکرایەوە، وتەبێژی حەج و عومرەی هەرێمیش رایدەگەیەنێت: سەرجەم ئەو حاجییانەی تا ئێستا نەگەڕاونەتەوە بەڕێگەی وشکانی دەگەڕێنەوە.  

کاروان ستونی وتەبێژی حەج و عومرەی وەزارەتی ئەوقافی هەرێم  بە وێبسایتی رەسمیی یەکێتیی نیشتمانیی کوردستان PUKMEDIA ی راگەیاند: دوای ئەو دۆخە نەخوازراوەی لە ناکاو هاتەپێش، سەرجەم ئەو حاجییانەی کوردستان کە لەڕێگەی ئاسمانیەوە گەشتیان کردبوو بە سەلامەتی گەیشتنەوە کوردستان و ئەو حاجیانەی کوردستانیش کە ئێستا لە شاری مەدینەن سەرجەمیان سەلامەتن و هیچ کێشەو گرفتێک لە ئارادا نیە.

راشیگەیاند: تاوەکو ئێستا 3 هەزار و 320 حاجی کوردستان بە ڕێگەی ئاسمانی گەڕاونەتەوە کوردستان و تەنها هەزار و 800 حاجی کوردستان لە شاری مەدینە ماون، بڕیاریشە سەرجەمیان لەڕێگەی وشکانییەوە بگەڕێنەوە هەرێمی کوردستان.

PUKMEDIA