کۆمپانیاکانی نەوت لە هەرێم دەست بەکارکردن دەکەنەوە

راگەیاندنی سەرۆکوەزیرانی عیراق

کۆبوونەوەی عەلی زەیدی لەگەڵ وەفدی هەرێم

سەرۆک وەزیرانی عیراق بڕیاریدا بە دەستپێکردنەوەی کاری کۆمپانیا نەوتییەکان لە هەرێمی کوردستان و لە سبەینێوە دەستبەکارەکانیان دەکەنەوە.

ئەمڕۆ 3ی6ی2026، عەلی زەیدی، سەرۆکوەزیرانی عیراق،پێشوازی لە وەفدێکی حکومەتی هەرێمی کوردستان بە سەرۆکایەتیی کەمال محەمەد ساڵح، وەزیری سامانە سروشتییەکان و ژمارەیەک لە نوێنەری کۆمپانیا نەوتییە جیهانییەکان کرد.

لە کۆبوونەوەکەدا، سەرۆکوەزیران لە نزیکەوە گوێبیستی وردەکاریی بارودۆخی کارکردنی کۆمپانیا نەوتییەکان بوو بەهۆی ئەو رەوشە ئەمنییەی بەهۆی جەنگی ناوچەکەوە دروستبووە، هاوکات وەفدی هەرێم و کۆمپانیاکان دیدگایەکی گشتگیریان بۆ دەستپێکردنەوەی کارەکانیان لە زووترین کاتدا پێشکەش کرد.

عەلی زەیدی جەختی لەوە کردەوە، ئەو زیانانەی بەهۆی راگرتنی هەناردەی نەوت لە رێگەی گەروی هورمزەوە بەر عیراق کەوتووە، زیانێکی گەورەیە و پێویستی بە هەوڵی چڕوپڕ هەیە بۆ قەرەبووکردنەوەی، لەو چوارچێوەیەشدا بڕیاری دا بە دابینکردنی سەرجەم پێداویستییەکان بۆ ئاسانکاریی کارکردنی ئەو کۆمپانیایانە.

سەرۆکوەزیرانی عیراق بڕیاریدا کە لە سبەینێوە، کۆمپانیا نەوتییەکان لە هەرێمی کوردستان دەست بە کارەکانیان بکەنەوە و جەختیشی کردەوە لەسەر گرنگیی کاری هاوبەش و دابینکردنی ژینگەیەکی لەبار و پێداویستییە سەرەکییەکان بۆ سەرخستنی ئەم پرۆسەیە.

PUKMEDIA