دابەشکردنی مووچەی مانگی نیسان بەردەوامە

PUKMEDIA

پارەی عیراقی

ئەمڕۆ 14ی 5ی 2026 بۆ دووەم رۆژ دابەشکردنی مووچەی مانگی نیسانی فەرمانبەران و مووچەخۆرانی هەرێمی کوردستان بەردەوامە و بەپێی ئەو خشتەیەی وەزارەتی دارایی ئابووری حکومەتی هەرێمی کوردستان بڵاویکردووەتەوە چەند وەزارەت و دەستەیەک مووچە وەردەگرن و سبەینێش بۆ کۆتا رۆژ دابەشکردنی مووچە بەردەوام دەبێت.

بەپێی خشتەكەی وەزارەتی دارایی هەرێم، ئەمڕۆ هەریەک لە (خانەنشینى پێشمەرگە، خاوەن پێداویستی تایبەت، مافی مرۆڤ، دەستەی دەستپاکی، دەستەی وەبەرهێنان، دەستی ژینگە، دەزگای مین، ناوچەکانی دەرەوەی هەرێم، کۆمسیۆنی باڵای هەڵبژاردن، دیوانی چاودێری، کاروباری شەهیدان و ئەنفالکراوان، ئاوەدانکردنەوە و نیشتەجێکردن، دارایی و ئابووری، ناوخۆ، داد، ئەنجومەنی دادوەری، پلاندانان، بازرگانی و پیشەسازی، سامانە سروشتییەکان، گواستنەوە و گەیاندن، کشتوکاڵ و سەرچاوەکانی ئاو، شارەوانی و گەشتوگوزار، کار و کاروباری کۆمەڵایەتی، رۆشنبیری و لاوان، کارەبا، ئەوقاف و کاروباری ئاینی، هێزی زێرەڤانی و فەرماندەی بەرگری فریاکەوتن، سەرۆکایەتی پەرلەمان، سەرۆکایەتی ئەنجومەنی وەزیران و سەرۆکایەتی هەرێم) مووچەی مانگی نیسان وەردەگرن.

ئەمەش لە کاتێکدایە وەزارەتی دارایی و ئابوری هەرێم لە راگەیەندراوێکدا دووشەممە ( 11 ی ئایاری 2026) رایگەیاند: بڕی ( 663،805،000،000 ) شەش سەد و شەست و سێ ملیار و هەشت سەد و پێنج ملیۆن دینار وەک بەشێک لە تەمویلی مووچەی مانگی نیسانی فەرمانبەران و مووچەخۆرانی هەرێمی کوردستان خرایە سەر هەژماری بانکی وەزارەتی دارایی و ئابوری هەرێمی کوردستان لە لقی هەولێری بانکی ناوەندی عیراق.

هاوکات 12ى5ى2026 وەزارەتی دارایی و ئابووری حکومەتی هەرێم لە راگەیەندراوێکدا رایگەیاند: دواین گوژمەی تەمویلی مووچەی مانگی نیسانی فەرمانبەران و مووچەخۆرانی هەرێمی کوردستان خرایە سەر هەژماری بانکی وەزارەتی دارایی و ئابووری هەرێمی کوردستان لە لقی هەولێری بانکی ناوەندی عیراق کە سەرجەمی بڕەکەی ( 961،736،000،000 ) نۆ سەد و شەست و یەک ملیار و حەوت سەد و سی و شەش ملیۆن دینارە .

PUKMEDIA