بڕ‌یاره‌ سبه‌ینێ داهاتی نانه‌وتی هه‌رێم بۆ به‌غداد بنێردرێت

PUKMEDIA

دراوى عیراقى

بڕ‌یاره‌ سبه‌ینێ رۆژی یه‌كشه‌ممه‌ 10ی5ی2026 داهاتی نانه‌وتی هه‌رێمی كوردستان ر‌ه‌وانه‌ی به‌غداد بكرێت، له‌دوای ناردنی داهاتی نانه‌وتیش ر‌ێككاره‌كانی ناردنی مووچه‌ی فه‌رمانبه‌ران ده‌ستپێده‌كات.

وه‌زاره‌تی دارایی ‌و ئابووری هه‌رێمی كوردستان، له‌ رۆژی سێ شه‌ممه‌ی ر‌ابردووه‌وه‌ نووسراوی ر‌ه‌سمی بڕ‌ی داهاتی نانه‌وتی بۆ به‌غداد ناردووه‌، ئێستا چاوه‌ڕ‌ێی ره‌زامه‌ندیی حكومه‌تی فیدراڵن بۆ ئه‌وه‌ی له‌سه‌ر 50%ـی داهاتی نانه‌وتیی مانگی نیسان ره‌وانه‌ی به‌غدادی بكه‌ن.

به‌ وته‌ی سه‌رچاوه‌یه‌كی وه‌زاره‌تی دارایی، كۆی داهاتی نانه‌وتیی مانگی نیسان نزیكه‌ی 100 ملیار دینار بووه‌، له‌و بڕ‌ه‌ش نزیكه‌ی 52 ملیار دیناری بۆ حكومه‌تی فیدراڵ ده‌بێت، سه‌رجه‌م رێككاره‌كانی ناردنی ئه‌و پاره‌یه‌ش ته‌واوبووه‌‌ و به‌ ئه‌گه‌رێكی زۆره‌وه‌ ر‌ۆژی یه‌كشه‌ممه‌ ده‌خرێته‌سه‌ر هه‌ژماری بانكیی وه‌زاره‌تی دارایی فیدراڵ.

له‌دوای ناردنی داهاتی نانه‌وتیش، رێككاره‌كانی ناردنی مووچه‌ی مانگی نیسانی مووچه‌خۆرانی هه‌رێمی كوردستان ده‌ستپێده‌كات، ئه‌گه‌ رچی باس له‌وه‌ ده‌كرێت كه‌ به‌هۆی پێكهێنانی حكومه‌تی نوێی عیراقه‌وه‌ رە‌نگه‌ ناردنی مووچه‌ دوابكه‌وێت، به‌ڵام سه‌رچاوه‌یه‌ك له‌ وه‌زاره‌تی دارایی عیراق تایبه‌ت به‌ PUKMEDIA ی راگه‌یاند: وه‌زیری دارایی ده‌توانێت ئیمزای ناردنی مووچه‌ی مووچه‌خۆرانی هه‌رێمی كوردستان بكات و پرسه‌ی پێكهێنانی حكومه‌ت هیچ كێشه‌یه‌ك بۆ ناردنی مووچه‌ بۆ هه‌رێم دروستناكات، چونكه‌ مووچه‌خۆرانی عیراقیش مووچه‌یان له‌ واده‌ی خۆدا پێدراوه‌.

وه‌زاره‌تی دارایی عیراق بۆ خه‌رجكردنی مووچه‌ی مووچه‌خۆرانی هه‌رێمی كوردستان چه‌ند مه‌رجێكی دیاری كردووه‌، له‌وانه‌ ناردنی لیستی مووچه‌، ته‌رازووی پێداچوونه‌وه‌، نووسراوی وه‌زاره‌تی نه‌وتی عیراق له‌باره‌ی پابه‌ندیی هه‌رێمی كوردستان به‌ هه‌نارده‌ی نه‌وت، له‌گه‌ڵ ته‌سلیمكردنی داهاتی نانه‌وتی.

PUKMEDIA