یەكێتی ئەوروپا هاوكاريی زیانلێكەوتوويی لافاوەكانی هەرێم و عیراق دەكات

European Union in Iraq

لۆگۆی یەكێتی ئەوروپا لە عیراق

یەكێتی ئەوروپا، هاوكاری مرۆیی پێشكەش بەو ناوچانەی عیراق و هەرێمی کوردستان دەكات كە بەهۆی لافاوەوە زیانیان بەركەوتووە و هاوكارییەكانیش بریتین لە 100 هەزار یۆرۆ، كەلوپەل و پێداویستی ناوماڵ، خۆراك و خزمەتگوزارییە سەرەتاییە تەندروستییەكان و ئاوی خواردنەوە.

دوای ئەو لافاوەی سەرەتای ئەم مانگە بەهۆی بارانبارینی بەخوڕەوە لەبەشێك لەناوچەكانی عیراق و هەرێمی كوردستان دروستبوو، یەكێتی ئەوروپا بڕیاریدا بڕی 100 هەزار یۆرۆ وەكو بودجەی مرۆیی بۆ پاڵپشتیكردنی ئەو كەسانە دابین بكات كە زۆرترین زیانیان بەركەوتووە.

یەكێتی ئەوروپا ئەم هاوكاریانە لەڕێگای مانگی سووری عیراق-ەوە دەگەیەنێتە زیانلێكەوتووان لەوانەش، كەلوپەل و پێداویستی ناوماڵ، دابینکردنی خۆراك، پێداویستی زستانە، هاوكاری نەختینەیی و خزمەتگوزاریی سەرەتایی تەندروستیی و ئاوی خواردنەوە، کە بەهۆیەوە زیاتر لە 16 هەزار كەس سوودمەند دەبن لەم هاوكارییە.

ئەمەش لەکاتێکدایە،لە ڕۆژانی 9 بۆ 12ی كانونی یەكەمی 2025، بارانی بەخوڕ بووەهۆی دروستبوونی لافاو لەچەند پارێزگایەكی عیراق و هەرێمی كوردستان، لەوانەش چەند ناوچەیەكی سنووری پارێزگای سلێمانی و كەركوك و هەولێرو نەینەوا كە بەهۆیەوە چەند كەسێك گیانیان لەدەستدا و سەدان ماڵ و دوكان و دامەزراوەی گشتی زیانیان بەركەوت و زۆرێك لەخێزانەكان ناچاربوون ماڵەكانیان بەجێبهێڵن.

PUKMEDIA