لیژنەی تۆماركردنی ئۆتۆمبێلە زیانلێكەوتووەكان دەستی بەكارەكانی كرد

PUKMEDIA

سەردانی زیانلێكەوتووان بۆلای لیژنەكە

ئەمڕۆ هەینی، ئەو لیژنەیەی كە بەفەرمانی قوباد تاڵەبانی بۆ تۆماركردنی ئەو ئۆتۆمبێلانەی بەهۆی لافاوەكەوە زیانیان بەركەوت پێكهێندرا، دەستی بەكارەكانی كرد و لە بەڕێوەبەرایەتی هاتووچۆی چەمچەماڵ دادەنیشێت و زیانلێكەوتووان دەتوانن بۆ خۆتۆماركردن سەردانی بكەن.

دوێنێ 11ی 12ی 2025، لەسەر فەرمانی قوباد تاڵەبانی، لیژنەیەك بۆ تۆماركرنی ئەو ئۆتۆمبێلانە پێكهێندرا كە بەهۆی لافاوەكەی چەمچەماڵەوە زیانیان بەركەوت و هەر لەلایەن قوباد تاڵەبانی-شەوە قەرەبوو دەكرێنەوە.

لیژنەكە لەهەریەك لە نوێنەری هاتووچۆی چەمچەماڵ، نوێنەری قائیمقامییەتی چەمچەماڵ، نوێنەری بەشی پۆلیسی چەمچەماڵ، نوێنەری ئاسایشی رۆژئاوای سلێمانی و نوێنەری بەرگری شارستانی چەمچەماڵ پێكهاتووە و لەئێستادا لە بەڕێوەبەرایەتی هاتووچۆی چەمچەماڵ ناوی خاوەن ئۆتۆمبێل و جۆر و مۆدێلی ئۆتۆمبێلەكان تۆمار دەكەن و زیانلێكەوتووان دەتوانن بۆ خۆتۆماركردن سەردانی بكەن.

ئەمەش لەكاتێكدایە لەسەر بڕیارو راسپاردەی سەرۆك بافڵ جەلال تاڵەبانی و قوباد تاڵەبانی، مەكتەبی ئیدارەو دارایی گشتی یەكێتی و كۆمپانیای ئانزۆ هەڵمەتێكی بەرفراوانیان لەتەواوی شەقام و كۆڵانەكان شاری چەمچەماڵ دەستیپێكرد بۆ بە هاناوەچوونی زیانلێكەوتووانی شارەكە و هاوكاریكردنی تیمە خزمەتگوزارییەكان.

بەگوێرەی دواین ئاماری بەرگری شارستانی هەرێم، بەهۆی ئەو شەپۆلە بارانبارینە بەخوڕەی لەسەرەتای ئەم هەفتەیەوە هەرێمی كوردستانی گرتەوە و لە چەند ناوچەیەك لافاو دروستبوو، سێ كەس گیانیان لەدەستداوە و 12 كەسیش بریندار بوون، هاوكات زیانی ماددی زۆریش بەر موڵك و ماڵی هاووڵاتیان و دامەزراوە حكومییەكان كەوت.

PUKMEDIA