ئیدارەی گشتی بە250 كرێكارو دەیان ئامێرەوە بەهانای زیانلێكەوتووانەوە دەچێت

PUKMEDIA

نوێنەری ئیدارەی گشتی یەكێتیی نیشتمانیی كوردستان

ئیدارەی گشتی یەكێتیی نیشتمانیی كوردستان، بە 250 كرێكار و 110 ئامێری جۆراوجۆرەوە هەڵمەتی پاككردنەوەی پاشماوەی لافاوەكەی دەستپێكردووە و نوێنەری ئیدارەی گشتیش دەڵێت: بەزووترین كات ناو ماڵ و شەقامەكان لە قوڕو لیتە پاكدەكەینەوە و بۆ دابینكردنی سەرجەم پێداویستییەكانیش دەستكراوەین.

نوێنەری ئیدارەی گشتی یەكێتیی نیشتمانیی كوردستان لە كۆنگرەیەكی رۆژنامەوانیدا رایگەیاند: بەهاوبەشی لەگەڵ سەرۆكایەتی شارەوانی چەمچەماڵ و قائیمقامییەتی چەمچەماڵ، پلانێكمان بۆ پاككردنەوەی پاشماوەی لافاوەكەی چەند رۆژی رابردووی سنوورەكە داڕشتووە، بەگوێرەی پلانەكەش، سەرەتا شەقامەكان پاكدەكرێنەوە و رێگەكان دەكرێنەوە، پاش نێوەڕۆش بە 25 تانكەر ئاو، ناو ماڵ و شەقامەكان لە قوڕو لیتە پاكدەكرێنەوە.

راشیگەیاند: ئیدارەی گشتی یەكێتیی نیشتمانیی كوردستان 250 كرێكار و 110 ئامێری  بۆ ئەو مەبەستە دابینكردووە و تیمەكانیشی دەستكراوە و سەرپشك كردووە بۆ ئەوەی سەرجەم پێداویستییەكانی پڕۆسەكە دابینبكەن، چونكە مەبەستمانە بە زووترین كات پاشماوەی لافاوەكە پاكبكەینەوە. 

نوێنەری ئیدارەی گشتی ئاماژەی بەوەشكرد: وەك كۆمپانیای ئانزۆ، هەر لە سەرەتای رووداوەكەوە هاوكاری زیانلێكەوتووانمان كردووە و بۆ گوندەكانیش ئامێر و تیمی تایبەتمان ناردووە، لەهەرشوێنێك هاووڵاتیان پێداویستیان هەبووبێت تیمەكانمان بەهانایانەوە چوون.

ئەمەش لەكاتێكدایە لەسەر بڕیارو راسپاردەی سەرۆك بافڵ جەلال تاڵەبانی و قوباد تاڵەبانی، مەكتەبی ئیدارەو دارایی گشتی یەكێتی و كۆمپانیای ئانزۆ هەڵمەتێكی بەرفراوانیان لەتەواوی شەقام و كۆڵانەكان شاری چەمچەماڵ دەستیپێكرد بۆ بە هاناوەچوونی زیانلێكەوتووانی شارەكە و هاوكاریكردنی تیمە خزمەتگوزارییەكان.

بەگوێرەی دواین ئاماری بەرگری شارستانی هەرێم، بەهۆی ئەو شەپۆلە بارانبارینە بەخوڕەی لەسەرەتای ئەم هەفتەیەوە هەرێمی كوردستانی گرتەوە و لە چەند ناوچەیەك لافاو دروستبوو، سێ كەس گیانیان لەدەستداوە و 12 كەسیش بریندار بوون، هاوكات زیانی ماددی زۆریش بەر موڵك و ماڵی هاووڵاتیان و دامەزراوە حكومییەكان كەوت.

PUKMEDIA