حزبە كوردستانییەكان پشتگیریی لەسەرۆك بافڵ دەكەن

PUKMEDIA

بافڵ جەلال تاڵەبانی، سەرۆكی یەكێتیی نیشتمانیی كوردستان

وەرگرتن و دەستبەكاربوونی بافڵ جەلال تاڵەبانی بە سەرۆكی هاوپەیمانیەتی رێكخراوی سۆسیال دیموكراتەكان لە جیهانی عەرەبی بووەتە مایەی دڵخۆشی خەڵك و پارتە سیاسیەكان و لەو چوارچێوەیەشدا بەشێك لە حزبە كوردستانیەكان لە پیرۆزباییەكانیان بۆ سەرۆك بافڵ تاڵەبانی، وێڕای پیرۆزبایی پشتگیریی و پشتیوانی خۆیان دوپاتدەكەنەوە.

پیرۆزبایی بزوتنەوەی رزگاری دیموكراتی كوردستان
عەبدوڵڵا نازەنینی سكرتێری گشتی بزوتنەوەی رزگاری دیموكراتی كوردستان لە پەیامێكدا وێڕای پیرۆزبایی، رایدەگەیەنێت ئەو پۆستە نەك هەر بۆ یەكێتیی نیشتمانیی كوردستان، بەڵكو بۆ سەرجەم كوردستانیان جێگەی شانازییە و كاریگەریی لەسەر داوا رەواكانی كورد دەبێت لە سەكۆ نێودەوڵەتیەكان.

پیرۆزبایی پارتی نەتەوەیی كوردستان
جەبار میرزارۆستەمی سكرتێری پارتی نەتەوەیی كوردستان دەستنیشانكردن و هەڵبژاردنی سەرۆكی یەكێتیی نیشتمانیی كوردستان بۆ ئەو ئەرك و بەرپرسیاریەتیە بە سەرەتایەكی ئەرێنی دەبینێ لە پێشخستن و گرنگی كورد و یەكێتی و بەڵێنیش دەدەن كە تەواوی پارتە سیاسیەكان پشتگیریی ئەو دەستكەوتە هەرێمی و نێودەوڵەتیە دەكەن.

پیرۆزبایی پارتی سەوزی كوردستان
ملكۆ بازیانی سەرۆكی پارتی سەوزی كوردستانیش لەگەڵ پیرۆزبایی و دەستخۆشی لە یەكێتی، هیوادەخوازێت بافڵ تاڵەبانی سەرۆكی یەكێتیی نیشتمانیی كوردستان لەو ئەركە گرنگە هەرێمیی و نێودەوڵەتیەدا سەركەوتوو بێت، چونكە جوڵە و كاریگەرییەكانی لە بەرژەوەندی داخوازییەكانی نەتەوەی كورددا دەشكێتەوە.

پیرۆزبایی بزووتنەوەی چاکسازیی نیشتمانی:
 بیرۆن عومەر فەتاح سکرتێری بزووتنەوەی چاکسازیی نیشتمانی وێڕای پیرۆزبایی لەسەرۆک بافڵ، رایدەگەیەنێت: وەرگرتنی ئەو بەرپرسیارێتییە جیهانییەی بەڕێزتان دەستکەوتێکی گرنگی سیاسی و جیهانییە بۆ گەلەکەمان و دەکرێت پشتیوانی زیاتری دۆستەکانمان بۆ گەلەکەمان مسۆگەر بکرێت.

PUKMEDIA