ئاسایش دەستگیرکردنی تۆمەتباری رووداوەکەی رێگای پێنجوێن-سلێمانی رادەگەیەنێت

PUKMEDIA

لۆگۆی ئاسایش

ئاسایش تۆمەتباری رووداوەكەی ڕێگای پێنجوێن-سلێمانیی دەستگیركردو رایگەیاند: "لەڕووداوەكەدا شۆفێرێك گیانیلەدەستداوەو هۆكاری ڕووداوەكەش بەهۆی دروستبوونی شەڕ و دەمەقاڵێوە بووە".

لەڕاگەیەندراوێكی دەزگای ئاسایشی هەرێم  كەكۆپییەكی بۆ PUKMEDIA نێردراوە راگەیەندراوە: "دوای ئەوەی شەوی ٢٠٢٥/٢/٥ رووداوی وەرگەڕانی ئۆتۆمبێلی خێزانێك لەسەر ڕێگای سلێمانی_پێنجوێن بووە هۆی گیان لەدەستدانی شۆفێری ئۆتۆمبێلەكە و برینداربوونی یەكێك لە سەرنشینانی، دەستبەجێ دەزگای ئاسایشی هەرێم دەستیكرد بە بەدواداچوون و لێكۆڵینەوە لەسەر هۆكاری ڕووداوەكەو سەرئەنجام دەركەوت بە دروستبوونی شەڕ و دەمەقاڵێ بووە لەنێوان دوو شۆفێر لەناحیەی ناڵپارێز، كەیەكێك لەشۆفێرەكان بە چەقۆ هێرش دەكاتە سەر شۆفێری بەرامبەری و برینداری دەكات و دواتر شوێنی دەكەوێت و دەبێتە هۆی وەرگەڕانی و گیان لەدەستدانی شۆفێرەكەو برینداربوونی یەكێك لە سەرنشینانی ئۆتۆمبێلەكە و دواتر تۆمەتباری ڕووداوەكە هەڵهات".

ئەوەشخراوەتەڕوو: "پاش وەرگرتنی بڕیاری دادوەری لێكۆڵینەوەی ئاسایش بەدواداچوون و لێكۆڵینەوە لەسەر ڕووداوەكە كرا و تۆمەتباری ڕووداوەكە دەستنیشانكرا، تۆمەتبار خۆی ڕادەستی هێزەكانی ئاسایش كرد و ڕووبەڕوی یاسا كرایەوە، لە ئێستادا تۆمەتباری ڕووداوەكە لەلایەن بەڕێوەبەرایەتی ئاسایشی سلێمانییەوە دەستگیركراوە و لێكۆڵینەوە لە كەیسەكەی بەردەوامە".

PUKMEDIA