گروپێکی مەترسیداری تاوانی ئەلکترۆنی دەستگیر دەکرێت

PUKMEDIA

لۆگۆی ئاسایش

دەزگای ئاسایش هەرێم دەستگیرکردن و هەڵوەشاندنەوەی گروپێکی مەترسیداری تاوانی ئەلیکترۆنی ڕادەگەیەنێت، کە زیاترلە (٢٥٠) کەسیان کردوەتە ئامانج لەتۆڕی کۆمەڵایەتی فەیسبووک.


دەزگای ئاسایشی هەرێم لە راگەیەندراوێکدا کە کۆپییەکی بۆ PUKMEDIA نێردراوە رایگەیاند: "دوای کۆکردنەوەی زانیاری وورد و دەستنیشانکردنی شوێنی تۆمەتبار لەلایەن تیمە تەکنیکییەکانی بەڕێوەبەرایەتی ئاسایشی سلێمانی توانیان ئەندامێکی سەرەکی باندەکە دەستگیربکەن، ئەم باندە داواکراون لەلایەن دەزگا ئەمنییەکانی هەرێمی کوردستان و پۆلیسی نێودەوڵەتی ( ئینتەرپول)ەوە، لەسەر سکاڵای ژمارەیەکی زۆر لە قوربانیانی ئەم باندە کەبەشێوەی گرووپ کاریان کردووە لە دەرەوەی ووڵات، بونەتەهۆی هەڕەشە و مەترسی بۆ سەر ژیانی ٢٥٠ کەس" .

هەر لە راگەیەندراوەکەدا هاتووە: "بەفەرمانی دادوەری لێکۆڵینەوەی ئاسایش، توانرا ئەندامی سەرەکی باندەکە بەناوی ( پ،ئ،ح ) بەئامانج بگرن و لە تورکیاوە بە پلانێکی تۆکمە بیگەڕێننەوە شاری سلێمانی و دەستبەجێ دەستگیری بکەن، هاوکات لە ئەنجامی لێکۆڵینەوەکان دەرکەوت تۆمەتبار زیاتر لە ٢٥٠ کەسی لە ڕێگەی تۆڕەکۆمەڵایەتییەکانەوە فریوداوە، باندەکە کەسانی خاوەن پێگەو و سەرمایەدار و بەتەمەنی کردۆتە ئامانج و بڕی سەد بۆ سەد و پەنجا هەزار دۆلاری لە ڕێگەی هەڕەشەکردن و بڵاوکردنەوەی گرتە ڤیدیۆکان وەرگرتووە، لەئێستادا تۆمەتبار بەماددەی ( ٢ )لەیاسای خراپ بەکارهێنانی ئامێرەکانی پەیوەندیکردن ڕاگیراوە و لێکۆڵینەوە لەدۆسیەکەی بەردەوامە".

PUKMEDIA