سه‌رۆك بافڵ: هه‌ڵبژاردن دواناخرێت

PUKMEDIA

سەرۆکی یەکێتی

نوێترین هه‌ڵوێستی یه‌كێتیی نیشتمانیی كوردستان له‌باره‌ی پرسی هه‌ڵبژاردنی خولی شه‌شه‌می په‌رله‌مانی كوردستان له‌سه‌ر زاری بافڵ جه‌لال تاڵه‌بانی سه‌رۆكی یه‌كێتییه‌وه‌ ئاشكرا كراو رایگه‌یاند:" هه‌ڵبژاردن دواناخرێت و له‌واده‌ی خۆیدا ده‌كرێت".

به‌گوێره‌ی راگه‌یه‌ندراوێكی رۆژنامه‌وانی نوسینگه‌ی سه‌رۆكی یه‌كێتی كه‌ وێنه‌یه‌كی بۆ PUKMEDIA نێردراوه‌ سه‌رۆك بافڵ كه‌ ئێستا له‌به‌غدایه‌ " كۆمه‌ڵێك دیدار و كۆبوونه‌وه‌ی سیاسی و دیپلۆماسی ئه‌نجامده‌دات".

سه‌رۆك بافڵ: هه‌وڵه‌كانمان له‌پێناو پاراستنی مووچه‌ی مووچه‌خۆرانه‌

هاوكات بافڵ جه‌لال تاڵه‌بانی سه‌رۆكی یه‌كێتیی نیشتمانیی كوردستان سه‌باره‌ت به‌ هه‌ردوو پرسی هه‌ڵبژاردن و كێشه‌ی مووچه‌ و بودجه‌ی خه‌ڵكی كوردستان، كه‌له‌ئێستادا پرسی گه‌رمی هه‌رێمه‌، له‌كۆبوونه‌وه‌یه‌كیدا له‌گه‌ڵ ئه‌لینا رۆمانۆسكی باڵیۆزی ئه‌مریكا له‌ عیراق رۆژی 7/4/2024 ده‌ڵێت:" هه‌ر له‌سه‌ره‌تاوه‌ هه‌وڵه‌كانی یه‌كێتی له‌پێناو پاراستنی مووچه‌ی مووچه‌خۆرانی هه‌رێمی كوردستان و تێكه‌ڵنه‌كردنی به‌ ململانێ سیاسییه‌كان بوو، كه‌ دواجار به‌ هه‌وڵی سه‌رۆكوه‌زیرانی عیراق، دادگای فیدراڵی و دۆسته‌كانی كورد توانرا ئه‌م كێشه‌یه‌ چاره‌سه‌ر بكرێت".

وتیشی:" كاری له‌پێشینه‌ی ئێمه‌ ده‌سته‌به‌ركردنی ژیانێكی شایسته‌ و شه‌ره‌فمه‌ندانه‌یه‌ بۆ خه‌ڵكه‌كه‌مان و هه‌موو هه‌وڵێكیش له‌و پێناوه‌دا ده‌ده‌ین، وه‌كچۆن هیوادارین هه‌موولایه‌ك به‌هه‌مان رۆحییه‌ته‌وه‌ كاربكه‌ن و له‌خزمه‌ت به‌دیهێنانی ئامانجه‌ باڵاكاندا بن".

هه‌وڵه‌كانی سه‌رۆك بافڵ بۆ چاره‌سه‌ركردنی كێشه‌كانی هه‌رێم و به‌غدا به‌رده‌وامه‌ 

پێشتریش  بافڵ جه‌لال تاڵه‌بانی سه‌رۆكی یه‌كێتیی نیشتمانیی كوردستان ته‌نها له‌ 5 مانگی رابردوودا له‌پێناوی داكۆكیكردن له‌ماف‌ و پرسی مووچه‌ و بودجه‌ی هه‌رێم و پرسه‌ باڵاكانی دیكه‌ی گه‌له‌كه‌مان، 42 جووڵه‌ی سیاسی و دیپلۆماسی له‌سه‌ر ئاستی عیراق و ناوخۆی هه‌رێم ئه‌نجامداوه‌ به‌ ئاراسته‌ی چاره‌سه‌ری بنه‌ڕ‌‌‌ه‌تی بۆ كێشه‌كانی نێوان هه‌رێم و به‌غدا، كه‌ ئه‌م كه‌یسه‌ هه‌میشه‌ له‌مه‌له‌فی سیاسی سه‌رۆكی یه‌كێتیدا هه‌بووه‌ و هاوته‌ریب بووه‌ له‌گه‌ڵ كه‌یسه‌كانی دیكه‌ی نیشتمانی و مافه‌ ده‌ستوورییه‌كانی هه‌رێم.

به‌گوێره‌ی به‌دواداچوونی PUKMEDIA، له‌ 5 مانگی رابردوودا له‌ 10/10/2023 تا 5/3/2024 سه‌رۆك بافڵ له‌ به‌شێكی دیدار و چالاكییه‌ سیاسیی و دیپلۆماسییه‌كانیدا له‌ سه‌رئاستی عیراق و هه‌رێم و باڵیۆز و كونسوڵ و دیپلۆماتكاران، هه‌روه‌ها له‌گه‌ڵ سه‌رۆك كۆمار و سه‌رۆك وه‌زیران و سه‌ركرده‌و‌ لایه‌نه‌ سیاسییه‌ عیراقی و كوردستانییه‌كان، داكۆكیكاری راسته‌قینه‌ی چاره‌سه‌ری پرسی" مووچه‌ و بودجه‌ و گوزه‌رانی خه‌ڵكی كوردستان و عیراقیش بووه‌".

سه‌رۆك بافڵ: پابه‌ندین به‌ به‌ڕ‌‌ێوه‌چوونی هه‌ڵبژاردن له‌واده‌ی خۆیدا

له‌باره‌ی پرسی هه‌ڵبژاردنیشه‌وه‌ له‌میانی كۆبوونه‌ی سه‌رۆكی یه‌كێتیی و باڵیۆزی ئه‌مریكا له‌عیراق نوێترین هه‌ڵوێستی یه‌كێتی له‌لایه‌ن سه‌رۆك بافڵ-ه‌وه‌ ئاشكرا كرا و رایگه‌یاند:"  رێز له‌ بڕ‌‌یاره‌كان ده‌گرین و پابه‌ندین به‌ به‌ڕ‌‌ێوه‌چوونی هه‌ڵبژاردن له‌ واده‌ی دیاریكراوی خۆیدا، ده‌مانه‌وێت پرۆسه‌كه‌ به‌شێوه‌یه‌كی بێگه‌رد به‌ڕ‌‌ێوه‌بچێت و ره‌نگدانه‌وه‌ی خواسته‌كانی هه‌موولایه‌ك بێت".

رزگار حاجی حه‌مه‌: یه‌كێتی له‌گه‌ڵ دواخستنی هه‌ڵبژاردن نییه‌

به‌گوێره‌ی مه‌رسومێكی سه‌رۆكی هه‌رێمی كوردستان رۆژی 10/6/2024 دیاریكراوه‌ بۆ هه‌ڵبژاردنی خولی شه‌شه‌می په‌رله‌مانی كوردستان، هاوكات لێپرسراوی مه‌كته‌بی هه‌ڵبژاردنه‌كانی یه‌كێتیش ده‌ڵێت:"یه‌كێتی سه‌رجه‌م ئاماده‌كارییه‌كانی بۆ به‌شداریكردن له‌هه‌ڵبژاردندا كردووه‌و بۆ هه‌ر چوار بازنه‌كه‌ش كاندیده‌كانی پێشكه‌شكردووه‌، هه‌ر ده‌نگۆیه‌كیش له‌باره‌ی رازیبوونی یه‌كێتی به‌ دواخستنی هه‌ڵبژاردن هه‌بێت راست نییه‌".

PUKMEDIA