یەکێتی و پارتی کۆدەبنەوە

PUKMEDIA

لۆگۆی یەکێتی و پارتی

مەکتەبی سیاسی یەکێتی و پارتی لەسەر ئاستی باڵا کۆدەبنەوەو یەکێک لە تەوەرە سەرەکییەکانی پرسی پێکهێنانی ئەنجومەنی پارێزگاکانی کەرکوک و نەینەوایە.

سەرچاوەیەک لەمەکتەبی سیاسی یەکێتی بە سایتی رەسمی یەکێتیی نیشتمانیی کوردستان PUKMEDIA ی راگەیاند: "کۆبونەوەکە لە سلێمانی لە دەباشان دەبێت و وەفدێکی باڵای پارتی سەردان دەکات و پیشنیوەڕۆی سبەینێ یەک شەممە 4-3-2024 لەگەڵ وەفدێکی باڵای مەکتەبی سیاسی یەکێتیی نیشتمانیی کوردستان کۆدەبێتەوە".

بە وتەی سەرچاوەکە تەوەری سەرەکی کۆبونەوەکە، "گفتوگۆکردنە لەبارەی پێکهێنانی ئەنجومەنی پارێزگاکانی کەرکوک و نەینەوا و هەروەها بابەتی هەڵبژاردنی پەرلەمانی کوردستانیش تەوەرێکی دیکەی ئەو کۆبونەوەیە دەبێت، کە بڕیارە سبەی بکرێت".

بڕیارە لەو کۆبونەوەیەشدا پێشهات و رووداوەکانی ناوچەکە بە گشتی تاوتوێ بکرێن.

ئەمەش لەکاتێکدایە پێشتر سه‌عدی ئه‌حمه‌د پیره‌ وته‌بێژی یه‌كێتیی نیشتمانیی كوردستان به‌سایتی ره‌سمی یه‌كێتی PUKMEDIA ی راگه‌یاندبوو:"ده‌ستپێكردنه‌وه‌ی كۆبوونه‌وه‌كانی یه‌كێتی و پارتی له‌ئێستادا زۆر گرنگه‌، به‌تایبه‌ت له‌دوای ئاڵۆزبوونی دۆخی هه‌رێمی كوردستان و عیراق و ناوچه‌كه‌، به‌تایبه‌تتریش له‌دوای به‌كارهێنانی درۆن و شه‌ڕ‌وپێكدادان له‌چه‌ند پارێزگاو شوێنێكی هه‌رێم و هه‌وڵدان بۆ تێكدانی ئارامی و سنوور به‌زاندنی خاكی هه‌رێم".

PUKMEDIA