بە فەرمانی قوباد تاڵەبانی زەوی بەسەر زیندانیان و راگیراوانی سیاسیدا دابەشدەكرێت

PUKMEDIA

شارەوانی سلێمانی

بە فەرمانی قوباد تاڵەبانی جێگری سەرۆكی حكومەت ئەمڕۆ 26-10-2023، 416 پارچە زەوی بەسەر زیندانیان و راگیراوانی سیاسیدا دابەشدەكرێت، بەپێی فەرمانەكەش لە داهاتوودا زەوی بۆ ئەوانەش دابیندەكرێت كە تائێستا سوودمەند نەبوون.

ئەحمەدی مام رەسوڵ بەڕێوەبەری گشتی خزمەتگوزاری كەسوكاری شەھیدان و زیندانیانی سیاسی لە وەزارەتی كاروباری شەھیدان لە لێدوانێكیدا بۆ سایتی رەسمی یەكێتیی نیشتمانیی كوردستان PUKMEDIA رایگەیاند: "ساڵی 2018، بە فەرمانی قوباد تاڵەبانی جێگری سەرۆكی حكومەت، بڕیاری دابەشكردنی 11 هەزار و 101 پارچە زەوی بۆ كەسوكاری شەھیدان و زیندانیانی سیاسی لە سەرجەم شارو شارۆچكەكانی ھەرێم دەكرا و ئەمڕۆش تیروپشك بۆ 416 كەس دەكرێت".

"پێویستە ئەو 416 زیندانیكراو و راگیراوە سیاسیانەی ناوەكانیان راگەیەندراوە ئەمڕۆ لەھۆڵی رۆشنبیری لەشاری سلێمانی ئامادەبن بۆكاری تیروپشك و وەرگرتنی زەوییەكانیان، لەلایەن لیژنەیەكی تایبەتەوە" ئەحمەدی مام رەسوڵ وادەڵێت.

راشیگەیاند: "لە بەردەوامبوونی ھەوڵەكان بۆ دابینكردنی زەوی تەرخانكراو بۆ زیندانیانی سیاسی بە فەرمانی قوباد تاڵەبانی زەوی بۆ ھەزار و 100 زیندانی كراوی سیاسی لە سنووری شارەوانی سلێمانی تەرخانكراوە، لەو ژمارەیەش 416 كەسیان وردبینی مامەڵەكانیان تەواوبووە، ئەوانەی ماونەتەوە پێویستە مامەڵەكانیان رەوانەی ھۆبەی زیندانیانی سیاسیی بكەن بۆ ئەوەی دوای تەواوكردنی وردبینی زەوییان بۆ تەرخان بكرێت".

ئەحمەدی مام رەسوڵ ئەوەشی راگەیاند: "لە چوارچێوەی جێبەجێكردنی فەرمانەكەی قوباد تاڵەبانیشدا لە دوو ساڵی رابردوودا زینداینانی سیاسی و كەسوكاری شەھیدان لە ئیدارە سەربەخۆكانی راپەڕین و گەرمیان زەویان وەرگرتووە".

PUKMEDIA

ناوی ئەو 416 زیندانیكراو و راگیراوە سیاسیانەی ئەمڕۆ زەویان پێدەدرێت: