لوقمان وەردی: پرۆژەکەی یەکێتی کۆتایی بە دواکەوتنی مووچە دەهێنێت

PUKMEDIA

لوقمان وەردی

بەپەسەندکردنی پرۆژەکەی یەکێتی کۆتایی بە دواکەوتنی مووچە دەهێنرێت و جێگری سەرۆکی فراکسیۆنی یەکێتیش دەڵێت: "دادپەروەری لە دابەشکردنی داهات قەوارەی هەرێم بەهێزتر دەکات و یەکێتیش لە بەغدا هەر ئەوەی کردووە".

لوقمان وەردی جێگری سەرۆکی فراکسیۆنی یەکێتی لە پەرلەمانی کوردستان بە سایتی رەسمی یەکێتیی نیشتمانیی کوردستان PUKMEDIA ی راگەیاند: "یەکێتی کۆتایی هێنا بەو نادادپەروەریەی کەلە ساڵانی رابردودا بە مەزاجی تایبەتی سزای پارێزگای سلێمانی هەڵەبجە و هەردوو ئیدارەی گەرمیان و راپەڕین درابوو، لەگەڵ جێبەجێکردنی پرۆژە یاسای بودجە چیدی دابەشکردنی مووچە دواناکەوێت و ئەو نادادییەش کۆتایی پێدێت".

"بەپێچەوانەی ئەو دەنگۆیانەی کە هەیە بەپەسەندکردنی پرۆژەکەی یەکێتی لەبارەی مامەڵەکردنی پارێزگاکانی هەرێم لەگەڵ حکومەتی عیراق لەکاتی نادادی لە دابەشکردنی داهات بەسەر پارێزگاکاندا دیموکراسی دەچەسپێنێت و ئەمەش وادەکات قەوارەی هەرێم بەهێزتر بێت نەک لاواز بێت"، لوقمان وەردی وای وت.

یەکێتی هەوڵیدا نادادی لەدابەشکردنی داهاتی نەوت لەهەرێمەوە چارەسەر بکات

لەساڵانی رابردوودا یەکێتی هەوڵیداوە نادادی لەدابەشکردنی داهاتی نەوت لە هەرێمەوە چارەسەر بکات، بەڵام گوێی لێنەگیرا، بۆیە لەپێناو خەڵکی هەرێمی کوردستان بڕیاری راگرتنی ئەو نادادیەی لەبەغداوە داو بە یاسا رایگرت.

جێگری سەرۆکی فراکسیۆنی یەکێتی ئەوەش دەڵێت: "مەلەفی نەوت لەهەرێمی کوردستان مەلەفێکی تاریک و ناڕون بوو، خەڵکی هەرێمی کوردستان و تەنانەت ئێمەش وەک پەرلەمانتاران نەماندەزانی داهاتی نەوت چەندە و چۆن بەسەر پارێزگاکاندا دابەشدەکرێت و هەروەها چۆن دەفرۆشرێت، بەڵام لە ئێستادا فرۆشتنی نەوتی هەرێمی کوردستان لەڕێگەی کۆمپانیای سۆمۆوە شەفافیەت بەرقەرار دەبێت و داهاتیش بەیەکسانی بەسەر پارێزگاکاندا دابەشدەکرێت".

وتیشی: "یەکێتی لە ساڵانی رابردوودا هەوڵی زۆریدا لەناوخۆی هەرێمەوە ئەو نادادییە چارەسەر بکات، بەڵام بەداخەوە گوێی لێ نەگیرا تاوەکوو لەپێناو خەڵکی هەرێمی کوردستان بە گشتی و پارێزگاکانی سلێمانی و هەڵەبجە و ئیدارەی گەرمیان و راپەڕین بە تایبەتی بڕیاری راگرتنی ئەو نادادیەی لەبەغداوە داو بە یاسا رایگرت".

PUKMEDIA