دەزگای ئاسایشی هەرێم دەستگیرکردنی بازرگانێکی ماددەی هۆشبەر رادەگەیەنێت

دەزگای ئاسایشی هەرێمی کوردستان

کەرەستە دەستبەسەرداگیراوەکان

بەڕێوەبەرایەتی ئاسایشی راپەڕین بازرگانێکی لە کاتی بازرگانیکردن بە ماددەی هۆشبەر دەستگیرکرد.

لە پێناو رێگریکردن لە بەکارهێنان و بازرگانیکردن بە ماددە هۆشبەرەکانەوە، بەڕێوەبەرایەتی ئاسایشی راپەڕین لە ئەنجامی گەڕان و پشکنینە بەردەوامەکانیان رۆژی ٢٠٢٣/٥/٢٦ لە ئیدارەی راپەڕین بە فەرمانی دادوەری لێکۆڵینەوەی ئاسایش تۆمەتبارێکیان دەستگیرکرد بەناوی ( م ، أ ، أ ) لە کاتی مامەڵەکردن بە ماددەی هۆشبەرەوە .

تۆمەتبار لە شوێنی دەستگیرکردنەکەیدا دەستگیرا بەسەر تەرازوی پێوانەکردن و کەرەستەی کێشانی ماددەکان و چەند بڕ و جۆرێک لە ماددە هۆشبەرەکانی ( هێرۆین ، شیشە ، ماریجوانە ) هەروەها دەستگیرا بەسەر چەکێکی بێ مۆڵەت لە جۆری دەمانچە، لە ئێستادا تۆمەتبار بە ماددەی ( ٢٦ ) لە یاسای بەرەنگاربونەوەی ماددە هۆشبەرەکان و کارتێکەرە ئەقڵیەکان راگیراوە و لێکۆڵینەوە لە دۆسیەکەی بەردەوامە .

لەلایەکی ترەوە لە پارکی منارەی ناو بازاڕی (رانیە) چوار مێرمنداڵ دەستگیرکران کە هەستاون بە بەکارهێنانی هەندێک ماددەی زیانبەخش بۆ مەبەستی بێهۆشبونیان بەکاریان هێناوە، بە فەرمانی دادوەر لەبەر تایبەتمەندی کەیسەکەیان و کەمی تەمەنیان رادەستی پۆلیسی نەوجەوانانی رانیە کران .

دەزگای ئاسایشی هەرێمی کوردستان سەرەڕای هەوڵەکانی بۆ بەگژداچونەوەی بازرگان و بەکارهێنەرانی ماددە هۆشبەرەکان و کەسانی لەیاسا دەرچوو، داواکارین لە دایکان و باوکان بەشداربن لە هەڵمەتی هۆشیاری لە زیانەکانی ماددە هۆشبەرەکان و زیاتر چاودێری و ڕێنوێنی منداڵەکانیان بکەن بە مەبەستی بەدورگرتنیان لە کاریگەریە خراپەکانی ئەو ماددانە لەسەر تاک و کۆمەڵگاکەمان .
PUKMEDIA