سەرۆکی فراکسیۆنی گۆڕان: هەموارکردنەوەی یاسای هەڵبژاردن و کاراکردنەوەی کۆمسیۆن یەک پاکێجە

PUKMEDIA

بەپەلە

سەرۆکی فراکسیۆنی گۆڕان داوا دەکات پرسی هەڵبژاردن بە گفتوگۆ لەنێوان لایەنەکاندا چارەسەربکرێت، هەروەها لایەنە بەشداربووەکانی حکومەت هاوڕابوین لەسەر ئەوەی کە هەموارکردنەوەی یاساکە و کاراکردنەوەی کۆمسیۆن یەک پاکێج بێت، بەڵام ئەوەی ئێستا دەگوزەرێت کاراکردنەوەی کۆمسیۆنە بەبێ هەمواری یاساکە و پەشیمان بونەوەیە لەو رێکەوتنە.

گوڵستان سەعید سەرۆکی فراکسیۆنی گۆڕان لە پەرلەمانی کوردستان لە کۆنگرەیەکی رۆژنامەوانیدا رایگەیاند: "پرسی هەڵبژاردن پرسێکی نیشتمانییە و پێویستە سازانی لایەنەکانی لەسەر بێت، ناکرێت لایەنێک لە بەرژەوەندی خۆی و بێ گوێدانە بەرژەوەندی گشتی ئەو پرسە بە لاڕێدا بەرێت".

"پێشتر لێکتێگەیشتن لە نێوان لایەنە سیاسییەکاندا بۆ پرسی هەڵبژاردن هەبوو، بەتایبەت لەنێوان لایەنەکانی پێکهێنەری حکومەت و لێکتێگەیشتنمان ئیمزا کردووە، کە پێویستە هەمواری یاسای هەڵبژاردن بکرێتەوە هاوتەریب لەگەڵیدا کۆمسیۆنیش کارا بکرێتەوە، ناکرێت کۆمسیۆن کارا بکرێتەوە بەڵام هیچ هەنگاوێکی جدی بۆ هەموارکردنەوەی یاساکە نەنرابێت"، گوڵستان سەعید وای وت.

PUKMEDIA