ئاسایشی هه‌ولێر سكاڵای نوێ له‌سه‌ر ده‌ستگیركراوانی شیلادزێ تۆمار ده‌كات

PUKMEDIA

دەستگیرکراوانی شیلادزێ

ئاسایشی گشتی هه‌ولێر سكاڵایه‌كی نوێ له‌سه‌ر 5 له‌ زیندانیانی شیلادزێ تۆمار ده‌كات بۆئه‌وه‌ی سزای زیاتریان به‌سه‌ردا بسه‌پێندرێت و دۆخی زیندانیانی بادینانیش به‌گشتی خراپه‌ و "ناوه‌نده‌ نێوده‌وڵه‌تیه‌كان و رێكخراوه‌كانی مافی مرۆڤ و كونسوڵخانه‌ی ئه‌مریكاش له‌و باره‌یه‌وه‌ ئاگادار ده‌كرێنه‌وه‌".

به‌شدار حه‌سه‌ن سه‌رۆكی تیمی پارێزه‌رانی ده‌ستگیركراوانی بادینان به‌ سایتی ره‌سمی یه‌كێتیی نیشتمانیی كوردستان  PUKMEDIA ی راگه‌یاند:" ئاسایشی گشتی هه‌ولێر سكاڵایه‌كی نوێی له‌سه‌ر 5 سزادراوه‌كه‌ی شیلادزێ له‌ بنكه‌ی پۆلیسی كوردستان له‌ هه‌ولێر تۆمار كردووه‌، گوایه‌ له‌ رۆژی دادگایی كردنیان له‌ 15/6/2022 ته‌شهیریان به‌ ئاسایش كردووه‌".

"ئه‌م سكاڵا نوێیه‌ی ئاسایشی گشتی هه‌ولێر بۆ سزادانی زیاتری ده‌ستگیركراوانی شیلادزێیه‌ و دۆخی زیندانیانی بادینایش به‌گشتی خراپه‌، بۆیه‌ ناوه‌نده‌ نێوده‌وڵه‌تی و رێكخراوه‌كانی مافی مرۆڤ و كونسڵخانه‌كانمان ئاگادار كردووەته‌وه‌" به‌شدار حه‌سه‌ن وایوت.

ماوه‌ی دوو ساڵ و سێ مانگه‌ پێنج له‌زیندانیانی شیلادزێ له‌سه‌ر بیروڕای جیاواز له‌هه‌ولێر زیندانی كراون و دوای ئه‌وه‌ی له‌رۆژی 11-12-2022 دادگا بڕیاری ئازادكردنی ئه‌و پێنج چالاكوانه‌ی ده‌ركرد، به‌ڵام ئاسایشی هه‌ولێر ئاماده‌نه‌بوو ئازادیان بكات.

ناو و رۆژی رفاندنی چالاكوانه‌ ده‌ستگیركراوه‌كانی شیلادزێ

مه‌حمود ناجی سدیق (چاڵاكڤان) .. شێلادزێ ٩/١٢/٢٠٢٠ 
كوڤان تارق جبرائیل (چاڵاكڤان) .. شێلادزێ ٩/١٢/٢٠٢٠
یوسف شه‌ریف ئیبراھیم (چاڵاكڤان) .. شێلادزێ ٩/١٢/٢٠٢٠
ئه‌مجه‌د یوسف موسته‌فا (چاڵاكڤان) شێلادزێ ١٤/١٢/٢٠٢٠ 
نێچیرڤان به‌دیع حاجی (چاڵاكڤان) .. شێلادزێ ١٤/١٢/٢٠٢٠ 

ئه‌مریكا نیگه‌رانه‌ له‌پاشه‌كشێی ئازادی له‌هه‌رێم

كونسوڵخانه‌ی گشتی ئه‌مریكا له‌ هه‌ولێر رایده‌گه‌یه‌نێت: "ئه‌مریكا نیگه‌رانه‌ له‌پاشه‌كشێی مافه‌كانی مرۆڤ و ئازادی راده‌ربڕ‌ین و راگه‌یاندن و مافی پێكهاته‌كان و ژنان له‌ هه‌رێمی كوردستان".

كونسوڵخانه‌ی گشتی ئه‌مریكا له‌ په‌یجی تایبه‌تی خۆی له‌ تۆڕ‌ی كۆمه‌ڵایه‌تی فه‌یسبووك، له‌زاری ئێرڤن هیكس كونسوڵی گشتی ئه‌مریكاوه‌ رایده‌گه‌یه‌نێت: "وڵاته‌كه‌ی نیگه‌رانه‌ له‌ پاشه‌كشێی مافه‌كانی مرۆڤ و ئازادی راده‌ربڕ‌ین و مافی پێكهاته‌كان له‌ هه‌رێمی كوردستان"،  بۆیه‌ دووپاتیده‌كاته‌وه‌: " ویلایه‌ته‌ یه‌كگرتووه‌كانی ئه‌مریكا پابه‌نده‌ به‌ پشتیوانیكردن له‌ ئازادیی راده‌ربڕ‌ین و ئازادیی راگه‌یاندن".

ئێرڤن هیكس ده‌ڵێت: "ئه‌مریكا پێیوایه‌ پێویسته‌ رۆژنامه‌نووسان و ناوه‌نده‌ میدیاییه‌كان رێگه‌یان پێبدرێت هه‌واڵه‌كان بگه‌یێنن به‌بێ ترس له‌ چاوترساندن و هه‌راسانكردن و تۆڵه‌ لێسه‌ندنه‌وه‌".

ئه‌مه‌ش له‌كاتێكدایه‌، پێشتر سه‌رۆكی تیمی پارێزه‌رانی سزادراوانی بادینان رایگه‌یاندبوو: "جیاوازییه‌كی زۆر له‌ مافی زیندانیانی سلێمانی له‌گه‌ڵ هه‌ولێر و دهۆك هه‌یه‌ و پێویسته‌ زیندانیانی هه‌ولێر و دهۆكیش وه‌ك زیندانیانی سلێمانی مافه‌كانیان پارێزراو بێت".

رۆژی 1-2-2023 وه‌زاره‌تی ده‌ره‌وه‌ی ئه‌مریكا خه‌ڵاتی به‌رگری له‌ مافی مرۆڤ به‌خشییه‌ پارێزه‌ری گیراوانی بادینان و ساڵانه‌ دوو كه‌س ئه‌و خه‌ڵاته‌ی وه‌زاره‌تی ده‌ره‌وه‌ی ئه‌مریكا وه‌رده‌گرن و بۆ ئه‌مساڵیش له‌كۆی 600 سیڤی له‌سه‌رتاسه‌ری جیهانه‌وه‌ پێشكه‌ش كرابوون، یه‌كێك له‌و دوو كه‌سه‌ به‌شدار حه‌سه‌ن سه‌رۆكی تیمی پارێزه‌رانی ده‌ستگیركراوانی بادینان بوو، كه‌ خه‌ڵاتی به‌رگری له‌ مافه‌كانی مرۆڤ ( Human Rights Defenders Award ) پێبه‌خشرا.

PUKMEDIA