د. نەرمین مەعروف: هەوڵەکانم بۆ گەشتیارانی هەرێم گەیشتە ئەنجام

پلاتفۆرمی د. نەرمین مەعروف

د. نەرمین مەعروف

بەهەوڵی ئەندامێکی فراکسیۆنی یەکێتی لە پەرلەمانی عیراق وەک فرۆکەخانەکانی دیکەی عیراق لە فرۆکەخانەکانی هەرێم دۆلار بە نرخی رەسمی بانکی ناوەندی دەدرێت بە گەشتیاران.

د. نەرمین مەعروف غەفور ئەندامی لیژنەی دارایی ئەنجومەنی نوێنەرانی عیراق بە سایتی رەسمی یەکێتیی نیشتمانیی کوردستان PUKMEDIA ی راگەیاند: "لەدوای هەوڵەکانم بۆ وەرگرتنی رەزامەندی بانکی ناوەندی بۆ فرۆشتنی دۆلار بە نرخی رەسمی بە گەشتیاران لە فڕۆکەخانەی نێودەوڵەتی سلێمانی و هەولێر، دوای بەدواداچوونی بەردەوامم لەگەڵ لقی بانکی بازرگانی عیراق لە شارەکانی هەرێم بۆ جێبەجێکردنی ئەو بڕیارە ئەمڕۆ خۆشبەختانە ئەو بڕیارە چووە بواری جێبەجێکردنەوە".

دەشڵێت: "گەشتیارانی هەرێمی کوردستان دەتوانن لەمڕۆوە بەمەرجی هەبوونی ڤیزا و بلیتی فڕۆکە بڕی ٧ هەزار دۆلار بکڕن بە نرخی رەسمی بانکی ناوەندی کە ١٣٢هەزار دینارە بۆ هەر ١٠٠ دۆلارێک".

د. نەرمین راشیگەیاند: "وەک سەرۆکی لقی بانکەکان لە لیژنەی دارایی بەدواداچون بۆ رێکارەکانی گۆڕینەوەی دراو بە نرخی رەسمی بانکی ناوەندی لە فرۆکەخانەکانی هەرێم دەکەم و هەوڵدەدەین بۆ هەر گەشتیارێک ئەگەر بیەوێت ئەو بڕە پارەیە بگۆڕێتەوە، لە ئایندەیەکی نزیکیشدا لە فرۆکەخانەی سلێمانی بەهەمان میکانیزم دۆلار دەدرێت بە گەشتیاران".

PUKMEDIA