Nêzîkî 12 hezar malbatên Serêkaniyê li benda vegerê ne

ANHA

Malbateke Koçber yê Serêkaniyê

Welatiyên koçber ên ku vedigerin bajarê xwe Serêkaniyê bi gelek astengiyan re rûbirû dimînin, ku ya herî diyar wêrankirina malan û kêmbûna xizmetguzariyên bingehîn e, tevî girtina rêyên sereke li pêşiya tevgera xelkê.

Koçberên bajarê Serêkaniyê di nav karwanên vegerê de ku li pey hev di mehên Tebax û Îlonê de dest pê kirin, dest bi vegerandina navçeyên xwe û gundên xwe kirin, û gelek navçeyên gundewarên Serêkaniyê, Til Temir û Zirkanê li xwe girtin.

1099 malbat di nava karwana yekem û duyem de bûn

Di karwana yekem de ku di 10ê Tebaxa borî de dest pê kir, nêzîkî 410 malbat vegeriyan gundewarê başûrê bajarê Serêkaniyê, ev yek jî di çarçoveya hewldanên vegerandina koçberan bo herêm û gundên wan de bû.

Her weha di 8ê Îlonê de, karwana duyemîn dest pê kir, ku 689 malbat tê de bûn, berê xwe dan gundewarê rojhilatê bajarê Serêkaniyê, û her wiha navçeyên gundewarên Til Temir û Zirkanê, bi vî rengî hejmara malbatên vegeriyayî di nava herdû karwanan de gihîşt nêzîkî 1099 malbatan.

Vegerîna xelkê di bin şert û mercên dijwar de pêk tê, ji ber ku vegeriyayî bi zehmetiyan re rû bi rû ne ku bi giranî di mezinahiya wêrankirina ku li mal û gundan bûye de diyar dibin, ligel windakirina gelek pîvanên jiyanê yên bingehîn, di serî de ava vexwarinê û karebê, ev yek jî zehmetiya bicihbûnê û vegerê bo jiyana normal zêde dike.

Daxwazên ji bo dabînkirina pîvanên bicihbûnê

Koçberên vegeriyayî daxwaza vekirina lezgîn a rêyên sereke dikin, ku ev yek rê dide wan ku hatinûçûnê bikin û bigihîjin bajarokên cîran. Her wiha koçber bang li saziyên hikûmî, rêxistinên mirovî û aliyên peywendîdar dikin ku piştgirî û alîkariyê pêşkêş bikin, û bixebitin ji bo dabînkirina xizmetguzariyên bingehîn, bi taybetî av û karebê, ligel beşdariyê di rakirina şopa wêrankirinê û nûjenkirina binesaziyê û rêyan de, da ku alîkariya xelkê bike ku careke din li herêmên xwe bicîh bibin.

Nêzîkî 12 hezar malbat li bendê ne ku vegerin

Li gorî komîteya koçberên Serêkaniyê, hejmara malbatên koçber ên ji bajar û gundewarê wî nêzîkî 13 hezar malbatane, piraniya wan li herêmên cuda yên Cizîrê ya Rojavayê Kurdistanê belav bûne, ligel bajarê Kobanê û herêmên din, ji dema koçberkirina wan ji herêmên wan ve di salên borî de.

Bi vegerîna 1099 malbatên koçber bo gundên xwe, nêzîkî 12 hezar malbat li benda vegerê ne beriya hatina demsala zivistanê. Tê çaverêkirin ku di nava hefteya pêş de, karwaneke nû ya koçberan dest pê bike, di nava bernameya vegera gav bi gav a malbatan bo herêm û gundên wan de, bi mercê ku karwan di dema pêş de li pey hev berdewam bikin da ku vegera bêtir xelkê temam bikin.

PUKMEDIA