Pirtûkxaneya Kerkûkê.. Gewhereke çandiye ber bi UNESCO ve

Ajans

Pirtûkxaneya Giştî ya Kerkûkê

Li parêzgeha Kerkûkê, çav li ser Pirtûkxaneya mîratî ya Kerkûkê ne, ji ber ku hewlên çandî û hikûmî roj bi roj zêde dibin da ku ew bê tomarkirin li ser Lîsteya Mîrateya Cîhanî ya Rêxistina Perwerde, Zanist û Çandê ya Neteweyên Yekbûyî (UNESCO). Ev hewl bi armanca parastina ev berhema dîrokî û xurtkirina hebûna wê wekî şahidê pirçandî û şaristaniya bajêr tê avêtin.

Berpirsê Ragihandin û Têkiliyan Çîya Ebdulsetar da xuyakirin ku; pirtûkxane xwedî nirxeke dîrokî, avahîsazî û çandî ya bêhempa ye û diyar kir ku tevlêkirina wê di lîsteya mîrata cîhanî de dê bibe stûnek girîng ji bo parastina wê û naskirina nirxa wê li ser asta navneteweyî.

Navika yekem a pirtûkxaneyê vedigere sala 1932an, dema ku ew di nava rêveberiya  Perwerdehiyê de hate avakirin û ji aliyê komîteyeke dilxwaz a mamosteyan ve dihate birêvebirin, bi armanca belavkirina zanînê û xurtkirina hişmendiya çandî di nav civakê de. Di sala 1937an de jî pirtûkxane bi fermî di avahiya xwe ya îroyîn de hat vekirin.

Ebdulsetar bang kir ku; divê hewlên saziyên çandî û akademîk werin yekxistin û sûd ji pispor û şarezayên di warên şûnwar û mîratê de bê girtin, da ku dosyeyeke berfireh û têkel bê amadekirin ku piştgiriyê bide hewldanên ji bo xistina pirtûkxaneyê nav lîsteya mîrata cîhanî.

Avahiya heyî xwedî nirxek mîratî û avahîsazî ya berbiçav e; ew li gorî şêwazeke Endulusî ya bêhempa hatiye avakirin. Nîşaneyên vî şêwazî di taqên mîratî û pêşiya wê bi pêkhateya xwe ya geometrîk a taybet de diyar dibin, ku ev yek taybetmendiyeke avahîsazî ya xweser da avahiyê û ew kir yek ji nîşanên çandî yên balkêş li Kerkûkê.

Her wiha ligel berdewamiya hewlên ji bo amadekirina dosyeya namzediyê, Pirtûkxaneya Mîratî ya Kerkûkê ne tenê wekî avahiyeke kevnar, lêbelê wekî bîranîneke zanyarî û nîşaneke avahîsazî derdikeve pêş ku aliyekî ji dîrok û pir alîbûna bajar nîşan dide. Tê çaverêkirin ku xistina wê nav lîsteya UNESCOyê de bibe gaveke girîng ber bi misogerkirina parastina mîrateya wê ji bo nifşên pêşerojê û naskirina wê li cîhanê.

PUKMEDIA